कॅमेरॉन यांच्याविरोधात असंतोष

युरोपीय समुदायाच्या विशेष परिषदेत तीव्र पडसाद

वृत्तसंस्था, ब्रसेल्स, लंडन

ऐतिहासिक ब्रेग्झिट निर्णयाचे तीव्र पडसाद युरोपीय समुदायाच्या विशेष परिषदेत मंगळवारी उमटले. ब्रेग्झिटनंतर उद्भवलेल्या परिस्थितीवर चर्चा करण्यासाठी सदस्य देशांची दोन दिवसीय विशेष परिषद मंगळवारी सुरू झाली. या परिषदेला हजेरी लावणारे ब्रिटनचे पंतप्रधान डेव्हिड कॅमेरॉन यांना अनेक देशांच्या प्रतिनिधींच्या असंतोषाला तोंड द्यावे लागले. समुदायातून बाहेर पडण्याची प्रक्रिया तातडीने सुरू करा. कोणत्याही विशेष वागणुकीची अपेक्षा करू नका, असेही कॅमेरॉन यांना सुनावण्यात आले.

मंगळवारी दुपारी सुरू झालेल्या या परिषदेत जवळपास सर्व सदस्य देशांच्या प्रतिनिधींनी मतप्रदर्शन केले. युरोपीय समुदायातून बाहेर पडण्याची मागणी करणाऱ्या नागरिकांपुढे कॅमेरॉन यांनी मान तुकवून सार्वमताला परवानगी दिली व त्यांनी हा विषय अतिशय सदोष पद्धतीने हाताळला, अशी टीका यावेळी करण्यात आली. सार्वमताच्या या निकालामुळे आपण राजीनामा देणार असून सप्टेंबरमध्ये आपला उत्तराधिकारी या समुदायातून बाहेर पडण्याची प्रक्रिया सुरू करेल, या कॅमेरॉन यांच्या विधानावरही संताप व्यक्त झाला. ही प्रक्रिया आम्हाला लवकरात लवकर सुरू करायची आहे. अगदी आजही ती सुरू झाल्यास आमची तयारी आहे, अशी तिखट प्रतिक्रिया समुदायाचे अध्यक्ष डोनाल्ड टस्क यांनी व्यक्त केली.

आम्ही खंबीर

युरोपीय समुदायातून ब्रिटनने काढता पाय घेतल्यानंतरही हा समुदाय खंबीरपणे उभा राहण्याएवढा प्रबळ आहे. जगभरातील देशांशी असलेले हितसंबंध भविष्यातही जपण्यात आपण यशस्वी होऊ, असा विश्वास जर्मनीच्या चान्सलर अँजेला मर्केल यांनी व्यक्त केला. या निर्णयानंतर आपण जबाबदारीतून मुक्त होऊ आणि आपले अधिकार मात्र अबाधित राहतील, असा समज ब्रिटनने करून घेऊ नये. युरोपमध्ये यापुढेही शांती, सुबत्ता आणि स्थैर्य कायम राहण्याची हमी आम्ही देतो, असेही त्या म्हणाल्या.