Coronavirus updates करोनाला रोखण्यासाठी ब्रिटनने आखली 'ही' योजना

लंडन: करोनाच्या संसर्गाला अटकाव करण्यासाठी ब्रिटन सरकारने नवी योजना आखली आहे. करोना लक्षणविरहित रुग्णांना शोधण्यासाठी ब्रिटनमध्ये आठवड्यातून दोन वेळेस चाचणी करण्याचा निर्णय घेण्यात आला आहे. या आठवड्यातील शुक्रवारपासून सर्व नागरिकांना जलद करोनाचाचणी (रॅपिड कोव्हिड टेस्ट) होणार आहे. ही चाचणी मोफत असणार आहे.

उद्योग, दुकाने, रेस्टॉरंट यांना लॉकडाउनच्या नियमांतून शिथिलता देण्याच्या दृष्टिकोनातून सरकारने हे पाऊल उचलले आहे. ब्रिटनमधील नागरिकांपैकी कुणालाही ही जलद करोनाचाचणी मोफत करणे शक्य होणार आहे. आठवड्यातून दोनदा ही सुविधा असेल. करोना विषाणूमधील बदल शास्त्रज्ञांना शोधणे यामुळे शक्य होणार आहे; तसेच मोठ्या प्रमाणावर झालेल्या चाचण्यांमुळे विषाणूंमध्ये उत्पपरिवर्तन नेमके कसे होते, हे शोधण्यासही त्यामुळे मदत होणार आहे.

वाचा: चिंता वाढली! अमेरिकेपेक्षाही भारतात सर्वाधिक नवीन करोनाबाधित

वाचा: करोनाचे थैमान: 'या' देशात कबरींतून उकरून काढावे लागले हजारो सांगाडे

ब्रिटनचे पंतप्रधान बोरिस जॉन्सन म्हणाले, ‘ब्रिटिश नागरिकांनी करोना विषाणूचा प्रादुर्भाव रोखण्यासाठी खूप प्रयत्न केले आहेत. लसीकरण मोहिमेमध्ये आमची प्रगती असून, निर्बंधांमध्ये हळूहळू शिथिलता आणली जात आहे. याच्याच बरोबरीने अधिकाधिक करोनाचाचण्या होणे हेदेखील महत्त्वाचे असून, विषाणूविरोधातील लढा त्यामुळे अधिक तीव्र होईल. त्यामुळेच ब्रिटनमध्ये सर्वांना जलद करोनाचाचणी करण्याची सुविधा आम्ही उपलब्ध करून देत आहोत. साथ आटोक्यात येण्यास त्यामुळे मदत होईल, असेही त्यांनी म्हटले.

वाचा: ब्रिटनची कबुली; 'ही' लस घेतल्यानंतर तयार झाल्या रक्ताच्या गाठी,

आतापर्यंत जलद करोनाचाचणी करण्याची सुविधा आरोग्य कर्मचाऱ्यांसह करोनायोद्ध्यांपुरती मर्यादित होती. यामध्ये ज्यांना कामावर जाणे जरूरीचे आहे अशा कर्मचाऱ्यांसह घरकाम करणारे कामगार, शालेय विद्यार्थी आणि त्यांच्या कुटुंबीयांचा समावेश होता. आता ते सर्वांसाठी खुले करण्यात आले आहे. ब्रिटनमध्ये आतापर्यंत ३.७ कोटी डोस देण्यात आले आहेत. जवळपास ५० लाख नागरिकांना करोना लशीचा दुसरा डोसही देण्यात आला आहे. करोना चाचणी अधिक व्यापक प्रमाणावर केल्यामुळे करोनाला अटकाव घालणे शक्य होईल असे अधिकाऱ्यांना वाटत आहे.