ऑस्ट्रेलियातील वणव्यात तीन जण मृत्युमुखी

वृत्तसंस्था, कॅबनेरा

ऑस्ट्रेलियाच्या पूर्वे किनाऱ्यावरील न्यू साउथ वेल्स राज्यात लागलेल्या वणव्यामध्ये तीन जण मृत्युमुखी पडले असून, ३० जण जखमी झाले आहेत. अनेक नागरिक अद्याप बेपत्ता आहेत; तसेच १५० हून अधिक घरे भस्मसात झाली आहेत, अशी माहिती सूत्रांनी दिली.

जोरदार वाऱ्यामुळे आग पसरत असून, सुमारे ७० ठिकाणी आगी लागल्या आहेत. त्या विझविण्यासाठी १५०० कर्मचारी झटत आहेत, अशी माहिती ग्रामीण अग्नीशमन सेवा आयुक्त शेन फिट्झसिमन्स यांनी दिली आहे. नुकसानीचे पंचनामे अद्याप करणे बाकी आहे. क्वीन्सलँडपासून ५०० किलोमीटरच्या पट्ट्यातील परिसरातील शेकडो नागरिकांनी आपली घरे सोडून मदत केंद्रांमध्ये आसरा घेतला आहे. पाच जण अद्याप बेपत्ता असल्याची माहिती देण्यात आली आहे. सिडनीपासून तीनशे किलोमीटर अंतरावर असलेल्या फॉस्टर या शहरातील बहुसंख्य नागरिकांना स्थलांतर करावे लागले आहे. काही जणांनी घर सोडून मोटारींमध्येच रात्र घालवली. तारी या गावातील ३०० नागरिकांना सुरक्षित स्थळी हलविण्यात आले आहे.