अमेरिकेला जबर झटका, चीनने २० हेर मारले

मटा ऑनलाइन वृत्त । पेइचिंग

अमेरिकेच्या किमान २० हेरांना ठार मारून चीनने हादरवून सोडले आहे. यामुळे अमेरिका आणि चीनमधील तणाव बाहेरून जितका गंभीर दिसतो त्यापेक्षाही आतली परिस्थिती भयंकर आहे. दोन्ही देशांच्या गुप्तहेर संस्था एकमेकांची हेरगिरी करण्याचा प्रयत्न करत असतात. यात हेरांना पकडण्यासाठी ते जीवाची बाजीही लावतात.

अमेरिकेची गुप्तचर संस्था CIA चे हेरगिरीचे प्रयत्न हाणून पाडण्यासाठी चीनने ताकद पणाला लावली आहे. २०१० पासून ते आतापर्यंत चीनने अमेरिकेच्या CIA चे एक डझनहून अधिक हेरांची हत्या केली आणि काहींना तुरुंगात डांबलंय. चीनच्या या गुप्त कारवाईने CIA च्या नेटवर्कला जबरदस्त झटका बसला आहे, न्यूयॉर्क टाइम्सने हे वृत्त दिलं आहे. २०१० ते २०१२ मध्येच CIA च्या १२ हून जास्त हेरांची चीनने हत्य केली होती.

अमेरिकेच्या ज्या हेरांची चीनने हत्या केली आहे त्यापैकी एकाला तर आपल्या सहकाऱ्याच्या समोर चीनने गोळी घातली. चीनने पेइचिंगमधील अमेरिकेच्या दुतावासातील अधिकाऱ्यांनाही सोडले नाही. इथं काम करणाऱ्या प्रत्येक कर्मचाऱ्याची चीनने कसून चौकशी केली, असं न्यूयॉर्क टाइम्सच्या वृत्त म्हटलं आहे.

चीनने CIA च्या किमान १८ ते २० हेरांची हत्या केली किंवा त्यापैकी काहींना तुरुंगात टाकलं आहे. रशियाबरोबरच्या शीत युद्धावेळी अमेरिकेचे जे नुकसान झाले त्याहूनही अधिक धक्का CIA ला चीनमध्ये बसला आहे, अशी माहिती अमेरिकेतील अधिकाऱ्यांनी नाव न सांगण्याच्या अटीवर दिली आहे. किमान दोन महिन्यांपूर्वी विकिलिक्सने CIA ची अत्यंत संवेदनशील आणि गुप्त फाइल्स लीक केल्या होत्या. CIA अकडून अजूनही याची तपासणी सुरू आहे.