वृत्तसंस्था, वॉशिंग्टन/बीजिंग
हाँगकाँगमध्ये लोकशाहीची मागणी करीत निदर्शने करणाऱ्या आंदोलकांना पाठिंबा देणाऱ्या कायद्यावर अमेरिकेचे अध्यक्ष डोनाल्ड ट्रम्प यांनी स्वाक्षरी केल्याने चीनचा पारा चढला आहे. 'अमेरिकेला सडेतोड प्रत्युत्तर दिले जाईल', अशी धमकी चीनने दिली आहे.
गेल्या आठवड्यात हे विधेयक अमेरिकेच्या सिनेटमध्ये आणि प्रतिनिधिगृहात मंजूर करण्यात आले. त्यानंतर हाँगकाँग मानवाधिकार आणि लोकशाही कायदा, २०१९ या कायद्यावर डोनाल्ड ट्रम्प यांनी बुधवारी स्वाक्षरी केली. या कायद्यानुसार, अमेरिकेच्या विदेश मंत्रालयाला वर्षातून एकदा 'अमेरिकेशी व्यापाराची आपली खास योग्यता राखण्यासाठी हाँगकाँग पुरेसा स्वायत्त आहे', याचे प्रमाणपत्र द्यावे लागणार आहे. अमेरिकेच्या अर्थव्यवस्थेला याची मदत होणार आहे. तसेच या कायद्याद्वारे हाँगकाँगमधील मानवाधिकारांच्या उल्लंघनासाठी जबाबदार ठरणाऱ्या चिनी आणि हाँगकाँगच्या अधिकाऱ्यांवर निर्बंध लादले जाऊ शकतात. यामुळे चीन आणि अमेरिका यांच्यातील तणाव वाढू लागला असून चीनने थेट प्रत्युत्तराची धमकीच अमेरिकेला दिली आहे. चीनच्या विदेश मंत्रालयाने म्हटले आहे की, हाँगकाँगच्या कारभारामध्ये गंभीर हस्तक्षेप आहे. हा चीनचा अंतर्गत मामला आहे.