Galwan Clash गलवान संघर्ष: 'या' कारणासाठी चीनने लपवून ठेवली ठार झालेल्या सैनिकांची माहिती!

बीजिंग: पूर्व लडाखमधील गलवान खोऱ्यात भारत-चीनच्या सैन्यामध्ये झालेल्या हिंसक संघर्षाला आठ महिने उलटून गेल्यानंतर चीनने ठार झालेल्या आपल्या सैनिकांची नावे जाहीर केली. भारतासोबत झालेल्या संघर्षात चार लष्करी अधिकारी आणि जवान ठार झाले होते. तर, एकजण गंभीर जखमी झाला होता. चीनच्या परराष्ट्र मंत्रालयाने यावर स्पष्टीकरण दिले आहे.

चीनच्या परराष्ट्र मंत्रालयाच्या प्रवक्त्या हुआ चुनयिंग यांनी शुक्रवारी सांगितले की, गलवान खोऱ्यात झालेल्या हिंसाचारानंतर चीनने तणाव कमी करण्यासाठी संयम बाळगला होता. दोन्ही देशातील सैन्यामध्ये संबंध खराब होऊ नये यासाठी चीनने ठार झालेल्या आपल्या सैनिकांची नावे जाहीर केली नव्हती, असे त्यांनी सांगितले. चिनी लष्कराने जारी केलेला अहवाल अनेक वेळा वाचला. हा अहवाल वाचल्यानंतर मनाला वेदना झाल्याचे त्यांनी सांगितले. चिनी जवान चेन होंगजून हे काही दिवसांमध्ये वडील होणार होते. मात्र, त्यांचा गलवान खोऱ्यात मृ्त्यू झाला. तर, शिआओ सियून हा लवकरच आपल्या प्रेयसीसोबत विवाह बंधनात अडकणार होता. चीनच्या संप्रभुतेच्या रक्षणासाठी या दोघांनी प्राण दिले असल्याचे हुआ यांनी सांगितले.

वाचा: गलवान खोऱ्यात सैनिक गमावले; चीनची पहिल्यांदाच अधिकृत कबुली

वाचा: इस्रायली अभियंत्यांनी चीनला विकले 'हे' घातक अस्त्र; भारताची चिंता वाढली!

त्याआधी चीनी सेनेचे अधिकृत वर्तमानपत्र 'पीएलए डेली'ने दिलेल्या एका बातमीनुसार, 'सेंट्रल मिलिटरी कमिशन ऑफ चायना'ने (CMC) काराकोरम रांगेत तैनात असलेल्या आणि जून २०२० मध्ये गलवान खोऱ्यात भारताविरुद्ध झालेल्या संघर्षात प्राण गमावलेल्या आपल्या पाच सैन्य अधिकारी-जवानांना श्रद्धांजली वाहिली.

वाचा: काश्मीरमध्ये पाकिस्तान नव्हे तर 'हा' देश पाठवणार भाडोत्री दहशतवादी?

गलवान खोऱ्यात हिंसक संघर्षात प्राण गमावणाऱ्यामध्ये पीएलएच्या शिनजियांग सेना तुकडीचे रेजिमेन्टल कमांडर क्युई फबाओ यांचादेखील समावेश होता, असे 'ग्लोबल टाईम्स'ने 'पीएलए डेली'च्या बातमीचा हवाला देत म्हटले. क्यु फबाओ, चेन होंगून, जियानगॉन्ग, जिओ सियुआन आणि वांग जुओरन अशी ठार झालेल्या चिनी सैनिकांची नावे आहेत. यातील चार जणांचा मृत्यू हिंसक संघर्षात झाला होता. तर एकाचा मृत्यू रेस्क्यू दरम्यान नदीत वाहून गेल्याने झाला होता.