बायडन म्हणाले, तालिबान आणि त्याच्या तीन मित्रांच्या वाटचालीवर आमचंही लक्ष!

वॉशिंग्टन: अमेरिकेने अफगाणिस्तानमधून सैन्य माघारी घेण्यास सुरुवात केल्यानंतर कमी अवधीतच तालिबानने अफगाणिस्तानवर ताबा मिळवला. तालिबानवर अमेरिकेने काही निर्बंध लावले आहेत. तर, दुसरीकडे तालिबानसोबत चीन, रशिया आणि पाकिस्तान राजकीय संबंध प्रस्थापित करण्यासाठी प्रयत्नशील आहेत. अमेरिकेचे राष्ट्राध्यक्ष जो बायडन यांनी त्यावर भाष्य केले आहे. तालिबान आणि त्याच्या तीन मित्रांच्या वाटचालीबाबत उत्सुकता असून काही वेळ प्रतिक्षा करावी लागणार असल्याचे बायडन यांनी म्हटले.

बायडन यांनी म्हटले की, अफगाणिस्तानमधून आम्ही माघार घेतल्यानंतर चीन तालिबानसोबत चर्चा करणार याचा आम्हाला पूर्ण अंदाज होता. चीनला तालिबान त्रासदायक ठरू शकतो. त्यामुळे चीनने आतापासूनच तालिबानसोबत संबंध प्रस्थापित करण्यास सुरुवात केली. चीनच नव्हे तर रशिया, पाकिस्तान आणि इराण या देशांकडूनही हेच प्रयत्न सुरू आहेत. भविष्यात या देशांकडून तालिबानबाबत काय धोरण घेतले जाईल याची उत्सुकता असल्याचे बायडन यांनी म्हटले.

पंतप्रधान जागतिक दहशतवादी, गृहमंत्री मोस्ट वॉन्टेड; तरीही तालिबान सरकारला मान्यता मिळणार?
अमेरिकेसह जी-७ राष्ट्रसमूहातील काही देशांनी तालिबानसोबत चर्चा केली आहे. मात्र, ही चर्चा हवाई मार्ग सुरू करणे आणि अन्य मुद्यांशी निगडित होती. अमेरिकेने सध्या अफगाणिस्तानच्या रिझर्व्ह फंडवर निर्बंध लादले आहेत. त्यामुळे तालिबानला त्याचा वापर करता येणार नाही.

तालिबान अमेरिकेच्या जखमेवर मीठ चोळणार? 'हा' निर्णय घेण्याची शक्यता
तर, दुसरीकडे चीन, रशिया, पाकिस्तानसह इतर काही देश तालिबानसोबत राजकीय संबंध प्रस्थापित करण्याच्या प्रयत्नात आहेत. चीनने तालिबानला आर्थिक मदत देण्याबाबतचीही घोषणा केली आहे. तालिबाननेही चीनला महत्त्वाचा देश असल्याचे म्हटले.

तालिबान-पाकिस्तानची युती भारतासाठी धोकादायक; माजी CIA अधिकाऱ्याचा इशारा

तालिबानकडून सरकार स्थापन सोहळ्याचे आमंत्रण; चीन, रशियाने घेतली 'ही' भूमिका
पाकिस्तानने तर अफगाणिस्तानमध्ये उघडपणे हस्तक्षेप सुरू केला आहे. तालिबानच्या मदतीसाठी पाकिस्तानने पंजशीरमध्ये हवाई हल्ले केल्याचे वृत्त होते. पाकिस्तानविरोधात मंगळवारी काबूल व इतर भागांमध्ये निर्दशनेही झाली होती.