'डोंगर हलवता येईल, चिनी सैन्य नाही!'

मटा ऑनलाइन वृत्त । बीजिंग

सिक्कीमच्या डोकलाममधून आम्ही मागे हटणार नाही, असा आक्रमक पवित्रा भारतानं घेतल्यानंतर प्रसारमाध्यमांमधून युद्धाच्या धमक्या देणाऱ्या चीननं आज भारताला थेट इशारा दिला आहे. 'एकवेळ डोंगर हलवणं शक्य आहे, पण चिनी सैन्य हलणार नाही. भारताने डोकलाममधून माघार घ्यावी, अन्यथा आम्ही तिथे आणखी सैनिक तैनात करू', अशी दर्पोक्ती चिनी सैन्याचे प्रवक्ते वू चिऐन यांनी दिली आहे.

चिनी सैन्यानं गेल्या ९० वर्षांत आपली ताकद दाखवून दिली आहे. भारतानं भ्रमात राहू नये. आमच्या सार्वभौमत्वाचं रक्षण करण्यासाठी आम्ही कोणतीही किंमत मोजायला तयार आहोत, अशी टोकाची भाषा वापरत चीननं भारतावर दबाव आणण्याची खेळी केलीय. त्याला आता भारताकडून काय प्रत्युत्तर दिलं जातं, याकडे जगाचं लक्ष आहे.

डोकलाम हा चीनचाच भूभाग आहे. त्यामुळे तिथे आम्ही रस्ता बांधत असू तर त्यात गैर काहीच नाही, असा दावा करत चिऐन यांनी उलट्या बोंबा मारल्या. भारतानेच चिनी हद्दीत घुसखोरी केली असून आंतरराष्ट्रीय कायद्याचं उल्लंघन केल्याचा आरोप त्यांनी केला. भारताने आपलं लष्कर मागे घेतलं तरच डोकलाम मुद्द्यावर चर्चा होऊ शकेल, या अटीवर चीन कायम असल्याचंही त्यांनी स्पष्ट केलं.

डोकलाममध्ये हातपाय पसरण्याचे मनसुबे भारतीय लष्कराने उधळून लावल्यानं चीनचा तीळपापड झाला आहे. सतत युद्धाच्या धमक्या देऊन, १९६२ पेक्षाही जास्त नुकसान करण्याचे इशारे देऊन भारताला झुकवण्याचा प्रयत्न चिनी लष्कर करतंय. पण, मागे हटणार नाही म्हणजे नाही, असं भारतानं त्यांना ठणकावलंय. आता हा तणाव कुठपर्यंत जातो, याकडे आंतरराष्ट्रीय वर्तुळाचं लक्ष लागलंय.