वृत्तसंस्था, बीजिंग
अमेरिकेने चिनी वस्तूंवर कर लावल्यानंतर चीननेही त्यास जशास तसे प्रत्युत्तर दिले असून, अमेरिकेकडून आयात होणाऱ्या वस्तूंवर ५० अब्ज डॉलरची वाढीव करवाढ केली आहे. अमेरिकेने २५ टक्के कर लावल्यामुळे जवळपास इतक्याच रकमेचा फटका चीनला बसत होता. चीन-अमेरिकेतही त्यामुळे व्यापारयुद्ध पेटले आहे.
ट्रम्प यांनी चीनवर बौद्धिक मालमत्तेची चोरी आणि व्यापाऱ्याच्या अनुचित पद्धतीचा आरोप करून चीनकडून अमेरिकेत आयात होणाऱ्या वस्तूंवर सुमारे ५० अब्ज डॉलरची करवाढ लादली होती. ही शुल्कवाढ भरून काढण्यासाठी चीननेही अमेरिकेच्या तब्बल ६५९ उत्पादनांवर अतिरिक्त २५ टक्के शुल्क आकारले आहे. या वस्तूंची यादीही चीनने जाहीर केली आहे. यानुसार सुमारे ३४ अब्ज डॉलर किमतीच्या ५४५ वस्तूंवरील अतिरिक्त शुल्कामधील ६ जूनपासून वाढ लागू करण्यात आली आहे. यात कृषी उत्पादने, वाहने, सागरी उत्पादने आदींचा समावेश आहे. आंतरराष्ट्रीय कायद्याला धरून हे केल्याचा दावा चीनने केला आहे.
अमेरिकेचे अध्यक्ष डोनाल्ड ट्रम्प यांनी सर्व देशांकडून अमेरिकेत आयात केल्या जाणाऱ्या पोलादावर २५ टक्के, तर अॅल्युमिनिअमच्या वस्तूंवर १० टक्के कर लावला. कॅनडा आणि मेक्सिको यांना यातून वगळण्यात आले. यामुळे भारतातून अमेरिकेला निर्यात होणाऱ्या स्टील व्यापाराला १९.८६ कोटी डॉलरचा, तर अॅल्युमिनिअम व्यापाराला ४.२४ कोटी डॉलरचा फटका बसला आहे. इतर वस्तूंमध्ये चणे, सफरचंद, अक्रोड, ८०० सीसीपेक्षा अधिक मोटरसायकली आदींचा समावेश आहे. आयात शुल्कावरून चीनप्रमाणेच भारतानेही अमेरिकेला जागतिक व्यापार संघटनेत आव्हान दिले आहे.