वुहानच्या प्रयोगशाळेत करोना विषाणूची निर्मिती; चीनमधून पळालेल्या शास्त्रज्ञाचा दावा

बीजिंग: करोना संसर्गाच्या निर्मितीबाबत अनेक चर्चा सुरू आहेत. चीनने करोनाचा विषाणू तयार केला असल्याचा आरोप अमेरिकेकडून सातत्याने केला आहे. आता चीनच्या प्रसिद्ध विषाणूशास्त्रज्ञ डॉ. ली-मेंग यांनी हा विषाणू मानवनिर्मितच असून आपण लवकरच याबद्दल पुरावे सादर करणार असल्याचे म्हटले आहे.

डॉ. ली-मेंग यांनी चीनमधून पळ काढला असून अमेरिकेत आश्रय घेतला आहे. त्यांनी सांगितले की, करोनाची महासाथ पसरली नव्हती तेव्हाच चीन सरकारला याबाबतची माहिती मिळाली होती. चीन सरकारने आपल्याबाबतची सर्वच माहिती मिटवली असल्याचेही त्यांनी सांगितले. वुहानच्या बाजारातून करोनाचा फैलाव झाला असल्याच्या बातम्या या दिशाभूल करणाऱ्या आहेत. आपण लवकरच एक अहवाल प्रसिद्ध करणार असून करोनाचा विषाणू हा मानवनिर्मित असल्याचा पुरावा देणार असल्याचे त्यांनी स्पष्ट केले.

वाचा:करोना: १५० हून अधिक लशींवर संशोधन; 'अशी' आहे लस विकसित करण्याची पद्धत

डॉ. यान यांनी सांगितले की, वुहानचा मांस बाजार हा एखाद्या पडद्यासारखा वापरण्यात आला आहे. या पडद्यामागे बऱ्याच घडामोडी झाल्या आहेत. हा विषाणू नैसर्गिक नाही. वुहानच्या प्रयोगशाळेतून हा विषाणू बाहेर आला असल्याचाही दावा त्यांनी केला. त्यांनी सांगितले की, जीनोमचा सिक्वेन्स हा माणसाच्या बोटांच्या ठश्यासारखा आहे. याआधारावर त्याची ओळख पटवता येऊ शकते. भक्कम पुराव्याच्या आधारे हा विषाणूच्या प्रयोगशाळेतून आला असल्याचे सांगणार असल्याचे त्यांनी म्हटले.

वाचा:चीनने करोनावर नियंत्रण कसे मिळवले: 'WHO'ने सांगितले सत्य

डॉ. यान यांनी सांगितले की, त्यांची माहिती चीनच्या सरकारी डेटाबेसमधून हटवण्यात आली आहे. सहकाऱ्यांना माझ्याविरोधात अफवा पसरवण्याचे निर्देश देण्यात आले आहेत. करोना विषाणूंचा अभ्यास करणाऱ्या पहिल्या काही मोजक्या काही शास्त्रज्ञांपैकी आपण एक असल्याचे त्यांनी म्हटले. चीन सरकार आपल्या जीवावर उठले असून हाँगकाँगमधून अमेरिकेत स्थलांतरीत झाले असल्याचे त्यांनी सांगितले.

वाचा:Explainer अमेरिका, ब्रिटन, रशिया आणि चीनच्या लशीत 'असा' आहे फरक!
दरम्यान, चीनने करोनाचा विषाणू वुहान येथील प्रयोगशाळेत बनवला असल्याचा आरोप याआधीदेखील अनेकदा फेटाळून लावला आहे. आंतरराष्ट्रीय स्तरावरील दबावासमोर झुकत चीनने जागतिक आरोग्य संघटनेच्या चौकशी पथकाला करण्यासाठी चीनमध्ये प्रवेश दिला. वुहान प्रयोगशाळेच्या संचालकांनीही करोना विषाणू प्रयोगशाळेत निर्मित झाला नसल्याचे म्हटले आहे.