खशोगींच्या हत्येचे आदेश युवराजांचे

वॉशिंग्टन : पत्रकार जमाल खशोगी यांच्या इस्तंबूलमध्ये करण्यात आलेल्या हत्येचे आदेश सौदी अरेबियाचे युवराज महंमद बिन सलमान यांनी दिले होते, असा निष्कर्ष 'सीआयए' या अमेरिकन तपाससंस्थेने काढला आहे. खशोगींच्या हत्येमध्ये युवराजांचा कोणत्याही प्रकारे सहभाग नसल्याच्या सौदी सरकारच्या दाव्याला सीआयएच्या या निष्कर्षामुळे छेद गेला आहे.

सौदी युवराजांचे टीकाकार आणि अमेरिकेचे रहिवासी असणारे खशोगी यांच्या हत्येमुळे आंतरराष्ट्रीय स्तरावर सौदी अरेबिया आणि त्याच्या राजघराण्याविरुद्ध संताप व्यक्त करण्यात येत आहे. खशोगी यांची हत्या करण्यासाठी सौदी अरेबियाचे १५ हस्तक सरकारी विमानांमधून इस्तंबूलच्या सौदी वकिलातीमध्ये गेले होते, असे 'सीआयए'च्या अहवालात नमूद करण्यात आले आहे. त्यामुळे खशोगी यांची हत्या युवराजांच्या सहभागाशिवाय होणे शक्य नाही, असे या अहवालाशी संबंधित अमेरिकन अधिकाऱ्याने म्हटले आहे.