उत्तर प्रदेश सुन्नी सेंट्रल वक्फ बोर्डाचा निर्णय
वृत्तसंस्था, लखनौ
अयोध्याप्रकरणी सर्वोच्च न्यायालयाने दिलेल्या निकालात मशिदीसाठी देण्यात आलेल्या पाच एकर भूखंडावर मशिद तसेच इंडो-इस्लामिक संशोधन केंद्र, तसेच एक रुग्णालय आणि एक ग्रंथालय उभारण्यात येईल, असे उत्तर प्रदेश सुन्नी सेंट्रल वक्फ बोर्डाने सोमवारी सांगितले.
उत्तर प्रदेश सुन्नी सेंट्रल वक्फ बोर्डाच्या बैठकीत ही जमीन स्वीकारण्याचा निर्णय घेण्यात आला. तसेच, या भूखंडावर समाजोपयोगी वास्तू उभारण्यात येणार असल्याचे सांगण्यात आले.
यूपी सरकारने दिलेल्या पाच एकर जमीन घेण्याचा निर्णय मंडळाच्या बैठकीत घेण्यात आला असल्याचे मंडळाचे अध्यक्ष झुफर फारुखी यांनी पत्रकारांना सांगितले. यासाठी बोर्ड एका ट्रस्टची स्थापना करणार असून, त्या मार्फत लवकरच मशिदीचे बांधकाम सुरू करण्यात येणार आहे, असेही फारखी म्हणाले.
मशिदीशिवाय या जमिनीवर इंडो-इस्लामिक संशोधन केंद्र, एक ग्रंथालय आणि चॅरिटेबल रुग्णालय आणि इतरही समाजोपयोगी संस्था उभारण्यात येतील. स्थानिक गरजा लक्षात घेऊन मशिदीच्या आकारमानाचा निर्णय घेतला जाईल, असेही ते म्हणाले.
अयोध्याप्रकरणी गेल्या वर्षी नोव्हेंबरमध्ये सुप्रीम कोर्टाने निकाल देताना मशिदीच्या बांधकामासाठी पाच एकर पर्यायी जागा देण्यात आली होती.
\R