संपूर्ण जगाचं टेन्शन वाढलं, ५ आठवड्यात ९ लाख लोकांचा मृत्यू; अहवालात धक्कादायक आकडेवारी समोर

बीजिंग : करोनाच्या जीवघेण्या संसर्गातून आता कुठे देश सावरत असताना आता चीनने पुन्हा एकदा जगाचं टेन्शन वाढवलं आहे. चीनमध्ये करोना व्हायरसमुळे झालेल्या मृत्यूबाबत धक्कादायक माहिती समोर आली आहे. तज्ञांनी दिलेल्या माहितीनुसार, चीनमध्ये सध्या करोनाचा उद्रेक पाहायला मिळत असून इथे पहिल्या ५ आठवड्यांमध्ये तब्बल ६०,००० लोकांचा करोनाच्या संसर्गाने मृत्यू झाल्याचं सांगण्यात येत आहे. ही आतापर्यंतची मोठी संख्या आहे.

अधिकृत आकडेवारीमध्ये वारंवार बदल होत असल्यामुळे जागतिक आरोग्य संघटनेसह देश-विदेशातही यावर टीका करण्यात येत आहे. पेकिंग युनिव्हर्सिटीच्या नॅशनल स्कूल ऑफ डेव्हलपमेंटच्या अहवालात असे समोर आले की, जानेवारीच्या मध्यापर्यंत ६४ टक्के लोकसंख्येला संसर्ग झाला होता. यानुसार गेल्या पाच आठवड्यांत ९००,००० लोकांचा मृत्यू झाला असेल असा अंदाज आहे.

आरोग्य आयोगाचे अधिकारी जिओ याहुई यांनी दिलेल्या माहितीनुसार, श्वसनाच्या आजारामुळे ५,५०३ लोकांचा मृत्यू झाला तर करोनामुळे ५४,४३५ लोक कोविड-१९ सोबत इतर आजारांमुळे मरण पावले. अशात काही लोकांनी रुग्णालयांमध्ये तर काही लोकांनी घरी जीव गमावल्यामुळे आकड्यांमध्ये मोठी तफावत असल्याची माहिती आहे.