राजे चार्ल्स तिसरे ठरले सर्वांत वयोवृद्ध ब्रिटिश सम्राट; दिमाखात राज्याभिषेक सोहळा संपन्न

वृत्तसंस्था, लंडन : लंडनमधील वेस्टमिन्स्टर अॅबे येथे पारंपरिक समारंभात ब्रिटनचे राजे चार्ल्स तिसरे यांचा राज्याभिषेक शनिवारी संध्याकाळी करण्यात आला. चार्ल्स यांनी मागील सप्टेंबरमध्ये त्यांच्या मातोश्री राणी एलिझाबेथ दुसऱ्या यांच्या निधनानंतर ब्रिटनचे राजे ही पदवी धारण केली होती. त्यानंतर शनिवारी संध्याकाळी कँटरबरीचे मुख्य बिशप जस्टिन वेल्बी यांनी राजे चार्ल्स तिसरे यांचा राज्याभिषेक केला. ब्रिटनच्या सिंहासनावर बसणारे ७४ वर्षीय राजे चार्ल्स तिसरे सर्वांत वयोवृद्ध ब्रिटिश सम्राट ठरले आहेत.

राजे चार्ल्स तिसरे यांनी कँटरबरीच्या आर्चबिशपसमोर पदाची शपथ घेऊन राज्याभिषेक सोहळ्यास सुरुवात झाली. या वेळी ब्रिटनचे पहिले हिंदू पंतप्रधान ऋषी सुनक यांनी धार्मिक ग्रंथाचे वाचन केले. या धार्मिक समारंभात चार्ल्स आणि त्यांच्या पत्नी कॅमिला यांनी ईश्वराच्या साक्षीने पदाची शपथ घेतली. या समारंभात त्यांच्या प्रतिकात्मक पुनर्विवाहाचाही समावेश होता.

कॅमिला यांनीही राणी मेरीचा मुकुट परिधान केला. हा मुकुट जून १९११मध्ये मेरी यांच्या राज्याभिषेकासाठी तयार करण्यात आला होता. त्या वेळी वादग्रस्त कोहिनूर हिरादेखील त्यात जडवण्यात आला होता. मात्र, नंतर तो काढून टाकण्यात आला. त्याऐवजी त्याची प्रतिकृती या मुकुटावर लावण्यात आली.

चार्ल्स यांच्या राज्याभिषेकावेळी वापरलेले सिंहासन मे १९३७मध्ये राजा जॉर्ज सहावे आणि राणी एलिझाबेथ यांच्या राज्याभिषेकासाठी तयार करण्यात आले होते. वेस्टमिन्स्टर अॅबे १०६६पासून पहिल्या विल्यमच्या काळापासून प्रत्येक ब्रिटिश राज्याभिषेकाचा साक्षीदार राहिले आहे. चार्ल्स तिसरे (वय ७४) आणि त्यांच्या पत्नी कॅमिला (वय ७५) यांनीही याच परंपरेचे पालन केले.

समारंभापूर्वी मिरवणूक

हिंदू, शीख, मुस्लिम, बौद्ध आणि ज्यू समुदायाच्या प्रतिनिधींनी चार्ल्स यांच्या राज्याभिषेकापूर्वी अॅबेमध्ये मिरवणूक काढली होती; तसेच समारंभाच्या वेळी ब्रिटिश संसदेचे वरिष्ठ सभागृह असलेल्या हाउस ऑफ लॉर्ड्समधील भारतीय वंशाच्या सदस्यांनी चार्ल्स यांना पारंपरिक पोषाख दिला. चार्ल्स आणि कॅमिला एका शाही बग्गीतून वेस्टमिन्स्टर पॅलेसमधून अॅबेमध्ये पोहोचले. त्यांच्यासोबत लष्करी जवानही होते. मध्य लंडनच्या रस्त्यांच्या दुतर्फा त्यांचे हितचिंतक मोठ्या संख्येने झेंडे फडकवत होते.

किंग चार्ल्स यांचा राज्याभिषेक, मुंबईच्या डबेवाल्यांना आमंत्रण, लघुपटाद्वारे बनले होते नाते

राजेशाहीविरोधात निदर्शने

आंदोलकांच्या काही गटांनी राजेशाही संपवण्यासाठी ट्रॅफलगर स्क्वेअरवर निदर्शने केली. या वेळी काही आंदोलकांना अटक केल्याचेही वृत्त आहे.

धनखड यांची उपस्थिती

अॅबेत आगमन झाल्यावर चार्ल्स यांचे राज्यप्रमुख आणि विविध समुदायांच्या प्रतिनिधींसह सुमारे २,२०० लोकांनी स्वागत केले. या ऐतिहासिक प्रसंगी उपराष्ट्रपती जगदीप धनखड आणि त्यांच्या पत्नी डॉ. सुदेश धनखड यांनी भारताचे प्रतिनिधित्व केले. ते दोघेही इतर राष्ट्रकुल देशांच्या राष्ट्रप्रमुखांसह येथे बसले होते.