ब्रिटनकडून भारताला लस मिळणार? पंतप्रधान कार्यालयाने दिली 'ही' माहिती

लंडन: भारतात करोना संसर्गाचे संकट अधिक गडद होत असताना दुसरीकडे जगभरातून मदतीचा ओघ सुरू झाला आहे. करोना महासाथीच्या आजाराशी दोन हात करण्यासाठी भारताला अमेरिका, ब्रिटन, रशिया, फ्रान्स आदी देशांकडून वैद्यकीय उपकरणे पाठवण्यात येत आहे. करोनाच्या संसर्गाला अटकाव करण्यासाठी लसीकरणाला वेग देण्याचे प्रयत्न सुरू आहेत. ब्रिटनकडून भारताला लस मिळणार असल्याची चर्चा सुरू होती. मात्र, ब्रिटनने ही चर्चा फेटाळून लावली आहे. आमच्याकडे लशीचा अतिरिक्त साठा नसल्याने भारताला लस देऊ शकत नसल्याचे ब्रिटनने म्हटले आहे.

ब्रिटनचे पंतप्रधान बोरिस जॉन्सन यांच्या प्रवक्त्यांनी याबाबतची भूमिका स्पष्ट केली. सध्या आमची प्राथमिकता ब्रिटीश नागरिक आहेत. त्यांच्या लसीकरणासाठी आमचे प्रयत्न सुरू आहेत. त्यामुळे सध्या आमच्याकडे लशीचा अधिकचा साठा नाही. मात्र, आम्ही लशीबाबत आढावा घेत असल्याचे त्यांनी सांगितले. त्यांनी पुढे म्हटले की, फेब्रुवारी महिन्यात आम्ही गरजू देशांना वैद्यकीय सामग्री व अत्यावश्यक वस्तू पाठवणार असल्याचे जाहीर केले होते. मात्र, ज्या वस्तू आमच्याकडे गरजेपेक्षा अधिक असतील अशाच वस्तू, सामग्री आम्ही देणार असल्याचे स्पष्ट केले होते, असेही त्यांनी यावेळी म्हटले.

वाचा: करोना लशीच्या एका डोसचा परिणाम; संसर्गाचा प्रसार ५० टक्क्यांनी कमी !

वाचा: WHO ने सांगितले, किती देशांमध्ये आढळला करोनाचा भारतीय वेरिएंट

जोपर्यंत सर्व नागरिक करोनापासून सुरक्षित नाही, तोपर्यंत कोणीच सुरक्षित नाही, असे आम्ही मानतो. त्यामुळेच ब्रिटनने करोनाच्या संकटाशी दोन हात करण्यासाठी मोठ्या प्रमाणावर गुंतवणूक केली असल्याचे त्यांनी सांगितले.

वाचा: 'करोना संकटात भारताने जगाला मदत केली, आता जगाने भारताला मदत करावी

वाचा: शक्य तेवढ्या लवकर भारत सोडा; अमेरिकेची नागरिकांना सूचना

ब्रिटनकडून भारताला ४९५ ऑक्सिजन कॉन्स्ट्रेटर्स, १२० नॉन-इनव्हेजिव व्हेंटिलेटर आणि २० मॅन्यूअल व्हेंटिलेटर पाठवण्यात आले आहेत. मंगळवारी सकाळी ब्रिटनहून १०० व्हेंटिलेटर आणि ९५ ऑक्सिजन कॉन्स्ट्रेटर्सची पहिली खेप दाखल झाली.