Video इराकमध्ये भीषण दुर्घटना; करोना वॉर्डला आग, ५२ जणांचा मृत्यू

बगदाद: इराकमधील दक्षिणेतील शहर नसीरियमधील एका रुग्णालयाच्या करोना वॉर्डला भीषण आग लागली. या आगीत ५२ जणांचा मृत्यू झाल्याची माहिती समोर आली आहे. तर, ६७ हून अधिकजण जखमी झाले आहेत. आगीवर नियंत्रण मिळवले असून मदत आणि बचाव कार्य सुरू करण्यात आले आहेत. या घटनेतील मृतांची संख्या वाढण्याची भीती व्यक्त केली जात आहे.

या भीषण आगीतून १६ जणांची सुटका करण्यात आली आहे. स्थानिक आरोग्य अधिकारी हैदर अल जमिली यांनी सांगितले की करोना वॉर्डमध्ये ही आग लागली. ऑक्सिजन सिलेंडरचा स्फोट झाल्याने ही आग लागली असल्याचे वृत्त 'रॉयटर्स' या वृत्तसंस्थेने दिले आहे. या आगीत होरपळून मृत्यू झालेल्यांची ओळख पटवण्यास अडचणी येत आहेत. धुरामुळे बचाव कार्यात अडचणी येत असल्याचे अधिकाऱ्यांनी सांगितले. सोमवारी रात्रीच्या सुमारास ही आग लागली असल्याचे सांगण्यात येते.



एका आरोग्य कर्मचाऱ्याने सांगितले की, आगीचा भडका उडाला. यामध्ये काही करोनाबाधित होरपळले. अग्निशमन दलाच्या जवानांना आणि मदत व बचाव पथकाच्या कर्मचाऱ्यांना आगीच्या ठिकाणी दाखल होण्यासही अडचणी येत होत्या.

पंतप्रधान मुस्तफा अल कादिमी यांनी या घटनेनंतर आपात्कालीन बैठक बोलावली. रुग्णालयातून अनेक मृतदेह काढण्यात आले. जखमी झालेल्यांवर उपचार करण्यात येत आहे. या घटनेनंतर रुग्णांच्या कुटुंबीयानी संताप व्यक्त केला. या रुग्णालयाच्या बाहेर मोठ्या प्रमाणावर गर्दी जमा झाली होती.