करोना: देहविक्रेत्यांची ग्राहक शोधण्यासाठी पायपीट

बँकॉक: 'करोना'मुळे लॉकडाउन झाल्यामुळे इथल्या देहविक्रेत्या ग्राहक शोधण्यासाठी रस्तोरस्ती फिरत असल्याचे सध्या चित्र आहे. पिम (३२) देहविक्रीकरून पोट भरणारी तृतीयपंथी दहा दिवसांपूर्वीपर्यंत आनंदाने जगत होती. एका बारमध्ये काम करून महिन्याला ठरावीक रक्कम तिच्या हातात पडत होती. त्यातच एखादा ग्राहक मनासारखे पैसे द्यायला तयार झाला, तर त्याच्याबरोबर जायचे, असा तिचा साधारण दिनक्रम होता. खिशात पैसे खुळखूळत होते. अनेकदा आठवड्याला ३००-६०० डॉलर हातात पडत होते; पण आता परिस्थिती पालटली आहे. पैसे मिळायचे बंद झाले आहेत. मात्र, बिले आ वासून उभी आहेत. पर्यटकांना देशात येण्यास बंदी केल्यामुळे आता करायचे काय, असा प्रश्न पिमसारख्या देशातल्या सुमारे तीन लाख देहविक्रेत्यांपुढे आहे.

'बाहेरची परिस्थिती बघून खूप भीती वाटते. करोनाच्या संसर्गाचीही काळजी वाटते; पण माझ्यासमोर ग्राहक मिळवण्यासाठी रस्त्यावर उतरण्यावाचून पर्याय उरलेला नाही. मला घराचे भाडे भरायचे आहे. घरात खायला अन्न नाही. त्यामुळे ग्राहक शोधावाच लागणार आहे,' चेहऱ्यावर मेकप लावून उसने अवसान आणलेली पिम पत्रकारांना सांगते.

वाचा: करोना: इटलीत दिलासा; स्पेनमध्ये थैमान सुरूच

लॉकडाउन जाहीर केल्यानंतर अनेक देहविक्रेत्यांनी घरचा रस्ता धरला. परिस्थिती सामान्य होईपर्यंत शहरात न परतण्याचा निर्णय त्यांनी घेतला आहे. मात्र,पिमसारख्यांना परतण्यासाठी घरच नसल्याने त्यांना रस्त्यावर येऊन ग्राहक शोधावे लागत आहेत. पिमची मैत्रिण अॅलिसही तृतीयपंथी आहे. गेली अनेक वर्षे तीदेखील देहविक्री व्यवसाय करते आहे. तिच्यावरही सध्या पिमप्रमाणे रस्तावर उतरून ग्राहक शोधण्याची वेळ आली आहे. 'आम्ही गरीब आहोत. त्यामुळे आमच्याकडे दुसरा कोणताही पर्याय नाही. मी हॉटेलचे बिल भरले नाही, तर ते मला बाहेर काढतील,' असे अॅलिस सांगते.

सध्या थालयंडमध्ये रात्री १० ते पहाटे ४ संचारबंदी लागू करण्यात आली आहे. ती २४ तास करण्याचा सरकारचा विचार आहे. सरकारी आकड्यांनुसार, अद्याप करोनामुळे दोन हजार जणांना संसर्ग झाला असून, २० जणांचा मृत्यू झाला आहे.

आणखी वाचा:
करोनाचा हाहाकार: अमेरिकेला या चुका भोवल्या?
'या' औषधाने ४८ तासांत करोनाचा खात्मा!