सहा फूटांच्या सोशल डिस्टेंसिंगवरही करोनाचा धोका!

लंडन: करोना विषाणूचा संसर्ग होऊ नये यासाठी सोशल डिस्टेंसिंगचा मार्ग अवलंब करण्याचे आवाहन करण्यात येत आहे. मात्र, एका अभ्यासानुसार, सहा फूटाचे अंतर राखूनही करोनाचा संसर्ग होण्याची भीती आहे. अनेक देशांनी लॉकडाउन उठवताना सोशल डिस्टेंसिंगच्या निर्देशांचे पालन करण्याच्या सूचना नागरिकांना दिल्या आहेत.

एका अभ्यासानुसार, हवेत एका हलक्या खोकल्यामुळे येणारी लाळेतील कण १८ फूटांपर्यंत पसरू शकतात. सायप्रस येथील निकोसिया विद्यापीठाच्या संशोधकांनी सांगितले की, प्रतितास चार किमी वेगाने वाहणाऱ्या हवेतून खोकल्यानंतर तोंडावाटे येणाऱ्या लाळेतील कण पाच सेकंदात १८ फूट दूरपर्यंत फैलावू शकतात.

या संशोधनातील सह-संशोधक दिमित्री द्रिकाकिस यांनी सांगितले की, खोकल्यातून येणाऱ्या लाळेच्या कणांमुळे वयस्कर आणि लहान मुलांना धोका संभवू शकतो. वैज्ञानिकांनी दिलेल्या माहितीनुसार, लाळेच्या सुक्ष्म कणांमुळे कमी उंचीच्या व्यक्तींना याचा अधिक धोका आहे, असेही त्यात म्हटले आहे. या लाळेच्या कणांच्या प्रवासावर अनेक घटकांचा परिणाम होतो. या बिंदूंचा आकार, संख्या, भवतालची हवा (ज्यामुळे ते नष्ट होतील किंवा त्यांचे बाष्पीभवन होईल), हवेची आर्द्रता आणि तापमान, हवेचे रेणू आणि बिंदूमधील रेणू (मोलेक्युल्स) यांची एकमेकांसोबतची क्रिया आदी बाबींमुळे या बिंदूंचा प्रवास कुठवर होईल हे ठरते, असे या अभ्यासात म्हटले आहे. संशोधकांनी 'कॉम्प्युटेशनल फ्लुइड डायनामिक्स सिम्युलेशन' तयार करून खोकल्यातून उडणाऱ्या बिंदूच्या प्रवासाचा अभ्यास केला. बंदिस्त ठिकाणी या बिंदूंच्या प्रवासावर अधिक अभ्यास होणे गरजेचे आहे, असेही त्यांनी म्हटले आहे. हे संशोधन जर्नल फिजिक्स ऑफ फ्लुइडमध्ये प्रकाशित झाले आहे.

वाचा: 'या' कारणांमुळे दक्षिण आशियात करोनाचा मृत्यू दर कमी!

दरम्यान, जगभरातील शास्त्रज्ञ करोनाचा संसर्ग रोखण्यासाठी लस विकसित करण्याचा प्रयत्न करत आहेत. अनेक देशांमध्ये करोनाच्या लसीवर संशोधन सुरू असताना करोनाला अटकाव करणारे औषध विकसित केले असल्याचा दावा चीनच्या शास्त्रज्ञांनी केला आहे. चीनमधील प्रतिष्ठित पेकिंग विद्यापीठाच्या वैज्ञानिकांनी हा दावा केला आहे. या औषधाने करोनाबाधिताच्या प्रकृती फक्त सुधारणा होणार नसून काही वेळेसाठी रोगप्रतिकार शक्ती वाढणार असल्याचा दावा करण्यात आला आहे. हा प्रयोग करोनाबाधित उंदरांवर यशस्वी झाला असल्याची माहिती देण्यात आली आहे.

आणखी वाचा:
करोनाला मात देऊनही पुन्हा बाधा झाल्यास 'हा' धोका नाही!
'या' देशात मास्क न घातल्यास होणार अटकेची कारवाई!
'करोना'चा बंदोबस्त करणाऱ्या लसीची चाचणी यशस्वी!