Coronavirus updates बापरे! करोनामुळे 'या' देशातील ७० टक्के मुले तणावात

टोकियो: करोनाच्या संसर्गाने जगभरात थैमान घातले आहे. करोनाच्या संसर्गाला अटकाव करण्यासाठी लॉकडाउन व इतर पर्याय अवलंबण्यात आले. करोना महासाथीच्या आजारात अनेकांना मानसिक तणावालाही सामोरे जावे लागत आहे. जपानमध्ये ७० टक्के विद्यार्थी तणावात असल्याचे समोर आले आहे.

जपान सरकारच्या नॅशनल सेंटर फॉर चाइल्ड हेल्थ अॅण्ड डेव्हलपमेंट यांनी केलेल्या पाहणीत हे धक्कादायक निष्कर्ष समोर आले आहेत. प्राथमिक, माध्यमिक आणि उच्च माध्ममिक विद्यार्थ्यांनी करोनामुळे आपले वाईट होईल, असा विचार सातत्याने येत असल्याचे म्हटले. करोनामुळे एकाग्रतेवरही परिणाम झाला असल्याचे विद्यार्थ्यांनी म्हटले आहे. करोनाच्या काळात ९ टक्के मुलांनी स्वत: ला इजा केली अथवा पाळीव प्राण्यांना मारहाण केली असल्याचेही समोर आले आहे.

वाचा: पाकिस्तानचे करोनावर नियंत्रण? सहा महिन्यानंतर शाळा सुरू

करोनाची बाधा आपल्या कुटुंबीयांपैकी कोणालाही होऊ नये, असे ३२ टक्केजणांना वाटत आहे. करोनावर मात केलेल्या व्यक्तींसोबत फिरायला जाणे अथवा त्यांच्यासोबत खेळायला आवडणार नाही, असे २२ टक्के जणांनी म्हटले आहे.

वाचा: करोना: डोनाल्ड ट्रम्प यांचे भारतावर गंभीर आरोप!

विविध तज्ञांच्या मदतीने १५ जून ते २६ जुलै दरम्यान हे ऑनलाइन सर्वेक्षण करण्यात आले. यामध्ये ६७७२ जणांनी सहभाग घेतला. यात ७ ते १७ या वयोगटातील ९८१ जणे होते. तर, ५७९१ जण हे १७ व त्यावरील वयोगटातील होते. अशा तणावाच्या स्थितीत मुलांशी सातत्याने चर्चा करायला हवी. मुलांची मानसिक स्थिती समजून घेत त्यांच्यात चिडचिडेपणा, हिंसक वृत्ती येणार नाही याची काळजी घेण्याची आवश्यकता असल्याचे बालरोग तज्ञ मायूमी हंगाई यांनी सांगितले. पालकांनी मुलांच्या भावना समजून घेऊन त्यातून मार्ग काढावा, त्यांच्याशी चर्चा केल्याने तणाव कमी होऊ शकतोो असेही त्यांनी सांगितले.

वाचा: करोनानंतर चीनमध्ये आणखी एक आजार फैलावला; आणीबाणी जाहीर

दरम्यान, जपानमध्ये Yuko Takeuchi या अभिनेत्रीने आत्महत्या केली असल्याचे समोर आले. जानेवारी महिन्यातच तिने एका बाळाला जन्म दिला होता. जपानमध्ये आतापर्यंत चार सेलिब्रेटींनी आत्महत्या केली आहे. आत्महत्यांचे वाढते प्रमाण लक्षात घेता जपान सरकारने नागरिकांना आपल्या मानसिक आरोग्याबाबत अधिक सजग राहून तज्ञांशी चर्चा करण्याचे आवाहन केले आहे.