Coronavirus updates करोना बळींची संख्या एक लाखांवर; 'या' देशाच्या पंतप्रधानाने स्विकारली जबाबदारी

लंडन: करोनाच्या संसर्गाने जगभरात थैमान घातले आहे. ब्रिटनमध्ये करोनाचा संसर्ग फैलावत असून बाधितांची संख्या दिवसेंदिवस वाढत आहे. करोना बळींची संख्या एक लाखाहून अधिक झाली आहे. मंगळवारी मृतांच्या संख्येने एक लाखांचा आकडा ओलांडल्यानंतर पंतप्रधान बोरिस जॉन्सन यांनी याची जबाबदारी स्विकारत दु:ख व्यक्त केले.

करोनाबाधितांच्या मृत्यूमुळे दु:खी झालेले पंतप्रधान बोरिस जॉन्सन यांनी सांगितले की, याची संपूर्ण जबाबदारी मी स्विकारत आहे. करोनामुळे झालेल्या मृत्यूमुळे मला अतीव दु:ख झाले आहे. मृतांच्या कुटुंबीयांसोबत शोक संवेदना व्यक्त करत असल्याचे त्यांनी सांगितले. करोनाच्या संसर्गाने अनेकांनी आपले आई-वडील, भाऊ-बहीण, मुलं गमावली आहेत. या कुटुंबीयांचे दु:ख मोठे असल्याचे त्यांनी म्हटले.

वाचा: करोनाचे थैमान सुरूच; १० कोटीहून अधिकजणांना बाधा, २१ लाख मृत्यू
एका पत्रकार परिषदेत बोलताना जॉन्सन यांनी सांगितले की, करोनाच्या संसर्गावर नियंत्रण मिळवण्यासाठी आमच्या सरकारने, मंत्र्यांनी सर्व प्रयत्न केले. या महासाथीच्या आजारामुळे विचार करण्यासाठी आणि सुधरण्यासाठी एक संधी आहे. लसीकरणानंतर बाधितांच्या संख्येत काही प्रमाणात घट झाली असल्याचे त्यांनी म्हटले.

वाचा: अमेरिकेत आढळला ब्राझीलचा सुपर स्ट्रेन; लशीचाही परिणाम नाही!

वाचा: ब्रिटीश शास्त्रज्ञांना मोठे यश; 'असा' रोखता येणार करोनाचा संसर्ग!

राष्ट्रीय सांख्यिकी कार्यालयाच्या मृत्यू आकलन प्रमाणपत्र विभागाने दिलेल्या माहितीनुसार, आतापर्यंत एक लाख चार हजार जणांचा मृत्यू झाला आहे. राष्ट्रीय आरोग्य सेवेचे अधिकारी क्रिस हॉपसन यांनी सांगितले की, करोनामुळे एक लाखजणांचा मृत्यू होणे ही अतिशय दुखद बाब आहे. लस घेण्यासाठी सर्वच समुदायाने पुढाकार घेण्याची आवश्यकता असल्याचे लसीकरणाचे प्रभारी मंत्री नदीम जहावी यांनी सांगितले.