Coronavirus vaccine एस्ट्राजेनेकाला धक्का; 'या' देशात लशीचा वापर कायमचा थांबवला

कोपेनहेगन: करोना लसीकरण मोहिमेत ऑक्सफर्ड-विद्यापीठ आणि एस्ट्राजेनेकाने विकसित केलेल्या करोना लशीचा मोठ्या प्रमाणावर वापर होत आहे. काही दिवसांपूर्वी लस वापरामुळे रक्ताच्या गाठी तयार होत असल्याच्या कारणांमुळे काही देशांनी या लशीचा वापर थांबवला होता. आता मात्र, डेन्मार्क या देशाने एस्ट्राजेनेकाच्या लशीला लसीकरणातून वगळले आहे. एस्ट्राजेनेकासाठी हा मोठा धक्का असल्याचे समजले जात आहे.

एस्ट्राजेनेकाच्या लशीच्या वापरावर बंदी घालणारा डेन्मार्क हा पहिलाच देश ठरला आहे. काही युरोपीयन देशांनी तात्पुरती स्थगिती आणली आहे. डेन्मार्कच्या करोना लसीकरणा कार्यक्रमात आता एस्ट्राजेनेका लशीचा वापर होणार नसल्याचे आरोग्य विभागाने सांगितले. एस्ट्राजेनेकाची लस सुरक्षित असल्याचे जागतिक आरोग्य संघटनेने म्हटले होते. त्यानंतरही डेन्मार्कने हा निर्णय घेतला आहे. भारतात एस्ट्राजेनेकाच्या लशीचे उत्पादन सिरम इन्स्टिट्यूट ऑफ इंडियाकडून केले जाते.

वाचा: करोना: अमेरिकेत 'जॉन्सन अॅण्ड जॉन्सन'च्या लशीचा वापर थांबवण्याचे आदेश

फिनलँडनेदेखील एस्ट्राजेनेका लशीच्या वापरावर काही बंधने आणली आहेत. वय ६५ आणि वरील वयांच्या व्यक्तिसाठी एस्ट्राजेनेकाच्या लशीचा वापर सुरू राहणार आहे. मात्र, दुसऱ्या डोससाठी इतर लस उत्पादकांसोबत चर्चा सुरू आहे. त्याशिवाय लसीकरणाबाबत पुढील नियोजन सुरू आहे.

वाचा: करोनाबाधितांच्या उपचारासाठी नेझेल स्प्रे प्रभावी; चाचणी यशस्वी झाल्याचा दावा

मागील महिन्यात डेन्मार्कसह युरोपीयन युनियनमधील काही देशांनी एस्ट्राजेनकाच्या लशीचा वापर तात्पुरत्या स्वरुपात थांबवला होता. यामध्ये डेन्मार्कसह, ऑस्ट्रिया, जर्मनी आदी देशांचा समावेश होता. युरोपीयन युनियनमधील तीन दशलक्ष नागरिकांना ही लस देण्यात आली. त्यापैकी २२ जणांच्या शरीरात रक्ताच्या गाठी तयार झाल्याच्या तक्रारी समोर आल्याची माहिती युरोपियन मेडिसिन संस्थेने दिली होती.

वाचा: 'या' कारणांनी करोना फैलावत असल्याचा पुरावाच नाही!

‘जॉन्सन अँड जॉन्सन’ लशीचा वापर थांबवला

दक्षिण आफ्रिकेने दक्षता म्हणून ‘जॉन्सन अँड जॉन्सन’ कंपनीच्या लशीचा वापर थांबवला आहे. लस घेतल्यानंतर रक्तामध्ये गाठी होण्याच्या शंकेतून हा निर्णय घेण्यात आला आहे. तर, युरोपीय देशामध्येही कंपनीच्या लशी पोहोचण्यास विलंब झाला आहे.

वाचा: महिलेच्या सहमतीशिवाय सेक्स करताना कंडोम काढला; पुरुषाविरोधात बलात्काराचा गुन्हा

दक्षिण आफ्रिकेमध्ये आतापर्यंत दोन लाख ८९ हजार जणांना ही लस देण्यात आली आहे. त्यातील कोणालाही या स्वरूपाचा त्रास झालेला नाही, असे आरोग्यमंत्री झ्वेली एमखिजे यांनी सांगितले. तर, या समस्येवर उपाय शोधण्याची सूचना ‘जॉन्सन अँड जॉन्सन’ला करण्यात आली आहे. या लशीतून रक्तामध्ये गाठ होण्याचा धोका आहे, ही शक्यता दुर्मिळ असली, तरीही अमेरिकेच्या नियामकांनी वापर थांबवण्याची शिफारस केल्यानंतर आफ्रिकेने दक्षतेच्या दृष्टीने हा निर्णय घेतला आहे. ‘जॉन्सन’च्या लशीचा पुरवठा रोखल्यामुळे, आधीच अपुऱ्या पुरवठ्यामुळे त्रस्त असणाऱ्या युरोपमधील लशींचा तुटवडा वाढणार आहे.