Coronavirus updates 'करोनाच्या नव्या स्ट्रेनमुळे मृतांची संख्या वाढण्याची भीती'

लंडन: मागील महिनाभरापासून ब्रिटनमध्ये करोनाच्या नव्या स्ट्रेनने थैमान घातले आहे. करोनाच्या या नव्या स्ट्रेनमुळे विषाणूचा संसर्ग अधिक वेगाने होत असून बाधितांच्या संख्येत वाढ होत आहे. आधीच्या स्ट्रेनच्या तुलनेत नवा स्ट्रेन कमी घातक असल्याचे म्हटले जाते. मात्र, या नव्या स्ट्रेनमुळे मृतांची संख्या वाढण्याचा धोका असल्याचे भीती ब्रिटनचे पंतप्रधान बोरिस जॉन्सन यांनी व्यक्त केली आहे.

बोरिस जॉन्सन यांनी सांगितले की, करोनाचा संसर्ग वेगाने फैलावत असताना दुसरीकडे मृत्यू दरही वाढण्याची शक्यता असल्याचे तज्ज्ञांनी म्हटले आहे. करोनाच्या या नव्या स्ट्रेनवर फायजर-बायोएनटेक आणि ऑक्सफर्ड-एस्ट्राजेनकाची लस प्रभावी असल्याचे त्यांनी म्हटले. करोनाला अटकाव करण्यासाठी देण्यात येणारी लस आधीच्या आणि आताच्या स्ट्रेनवर प्रभावी आहे. ब्रिटनमध्ये शुक्रवारी जारी केलेल्या माहितीनुसार, ५३.८ लाख लोकांना करोनाचा पहिला डोस देण्यात आला आहे.

वाचा: करोना काय कमी होता! ब्रिटनवर कोसळले अस्मानी संकट
वाचा: चीनमधील बोगस लशीचा परिणाम; आणखी एक आजार फैलावला

ब्रिटन आणि स्कॉटलंडमध्ये करोनाच्या वाढत्या संसर्गामुळे ४ जानेवारी रोजी नवीन निर्बंध लागू करण्यात आले. आरोग्य मंत्रालयाने दिलेल्या माहितीनुसार, मागील काही दिवसांपासून करोनाचे नवीन रुग्ण आढळण्याचे प्रमाण कमी झाले असून बाधितांच्या संख्येत दरदिवशी एक ते चार टक्के घट होत आहे. त्यामुळे लवकरत परिस्थिती पूर्वपदावर येऊ शकते. प्रशासनाने नागरिकांना नियमांचे पालन करण्याचे आवाहन केले आहे. करोना लशीचा डोस घेतला असला तरी नागरिकांनी घरीच थांबावे असे आवाहन आरोग्य मंत्रालयाने केले आहे.

वाचा: काळजी घ्या! हॅण्ड सॅनिटायझरमुळे लहान मुलांना येऊ शकते अंधत्व

वाचा: करोना लसीकरण: जगाला मिळणार दिलासा; अमेरिका घेणार 'हा' निर्णय

दरम्यान, ब्रिटनमध्ये आलेल्या क्रिस्टोफ वादळामुळे आलेल्या पुरामुळे अनेक ठिकाणी पाणी साचले आहे. त्यामुळे काही इमारतींचेही नुकसान झाले आहे. इंग्लंड आणि स्कॉटलंडमध्ये तीन फूट बर्फवृष्टी झाली आहे. या भागांमध्ये जवळपास २०० रस्ते बंद असून लोकांना घरातच थांबण्याचे आवाहन करण्यात आले आहे.