Coronavirus करोना: आगामी सहा महिने धोक्याचे; बिल गेट्स यांनी दिला इशारा

वॉशिंग्टन: करोनाच्या संसर्गाला अटकाव करण्यासाठी लस विकसित करण्याचे प्रयत्न सुरू आहेत. काही लशींना मंजुरी मिळाल्यामुळे करोनाविरुद्धची लढाई निर्णायक टप्प्प्यात आली असल्याचे म्हटले जाते. मात्र, त्याच वेळेस आता मायक्रोसॉफ्टचे सहसंस्थापक बिल गेट्स यांनी मोठा इशारा दिला आहे. आगामी चार ते सहा महिने महासाथीच्या दृष्टीने आव्हानात्मक असणार असल्याचे त्यांनी सांगितले.

बिल अॅण्ड मेलिंडा फाउंडेशनचे सह-अध्यक्ष बिल गेट्स यांनी सीएनएनला दिलेल्या मुलाखतीत म्हटले की, करोना महासाथीच्या आजारात आगामी चार ते सहा महिन्यांचा काळ वाईट असू शकतो. इन्स्टिट्यूट फॉर हेल्थ मॅट्रिक्स अॅण्ड अॅवेल्यूएशनच्या (आयएचएमई) अंदाजानुसार, दोन लाखांहून अधिकजणांचा मृत्यू होण्याची शक्यता आहे. मास्कचा वापर करणे, सोशल डिस्टेसिंग आदीसारख्या उपाययोजना अंमलात आणल्यास हे संभाव्य मृत्यू रोखता येऊ शकतात.

वाचा: काय सांगता...'ही' लस घेतल्यास दोन वर्ष करोना होणार नाही!

वाचा: करून दाखवलं! 'हा' देश करोनामुक्त झाल्याची घोषणा

गेट्स यांनी सांगितले की, मागील काही आठवड्यांमध्ये अमेरिकेत संसर्ग बाधितांची संख्या, मृत्यू आणि रुग्णालयात दाखल होणाऱ्यांच्या संख्येत विक्रमी वाढ झाली आहे. अमेरिका अशा कठीण परिस्थितीवरही मात करेल असा विश्वास वाटत असल्याचे त्यांनी सांगितले. त्यांनी पुढे म्हटले की, २०१५ मध्ये अशाप्रकारच्या आजाराबाबत अंदाज वर्तवला होता. त्यावेळी मृतांची संख्या अधिक असू शकते असे वाटले होते. हा विषाणू जेवढा धोकादायक आहे, त्याहून अधिक घातक ठरू शकतो. आपण अजूनही महासाथीच्या आजाराचा वाईट काळ पाहिला नसल्याचे त्यांनी सांगितले.

Explainer करोना लस दिल्यानंतर प्रकृतीत बिघाड; जाणून घ्या लक्षणे आणि कारणे!

दरम्यान, अध्यक्षपदाची सूत्रे स्वीकारल्यानंतर पहिल्या १०० दिवसांत १० कोटी अमेरिकींना करोनाची लस देण्यात येईल, अशी महत्त्वाकांक्षी घोषणा अमेरिकेचे नवनिर्वाचित अध्यक्ष जो बायडन यांनी मागील आठवड्यात केली होती. याशिवाय मास्क वापरणे सर्वांसाठी अनिवार्य करण्यात येईल व बहुतांश शाळा पुन्हा सुरू करण्याचा प्रयत्न केला जाईल, असेही ते म्हणाले. अमेरिका राष्ट्राध्यक्षपदाच्या निवडणुकीत करोना संसर्गाच्या मुद्यावर मोठी चर्चा झाली होती. अमेरिकेच्या अर्थकारणालाही करोनामुळे मोठा फटका बसला आहे. एक कोटीहून अधिकजणांना करोनाची लागण झाली असून अडीच लाख नागरिकांना प्राण गमवावे लागले आहे.

वाचा: करोनाचा हाहाकार: 'या' देशाच्या पंतप्रधानांचे संसर्गाने निधन

जगभरात करोना संसर्गाचे थैमान सुरू आहे. करोनाबाधितांची संख्या सात कोटी २२ लाखांहून अधिक झाली आहे. तर, १६ लाखांहून अधिकजणांचा मृत्यू झाला असल्याची माहिती जॉन्स हॉपकिन्स विद्यापीठाने दिली. अमेरिकेत करोनाचा सर्वाधिक संसर्ग फैलावला आहे. अमेरिकेत एक कोटी २४ लाखांहून अधिकजणांना करोनाची बाधा झाली आहे. त्यापैकी दोन लाख ९९ हजारजणांचा मृत्यू झाला आहे. करोनाबाधितांच्या संख्येनुसार भारतात ९८ लाख नागरिकांना करोनाची बाधा झाली असून एक लाख ४३ हजारजणांना प्राण गमवावे लागले आहे.