Coronavirus updates भारतात करोनाचे थैमान; 'या' देशांकडून भारतीयांना प्रवेश बंदी

लंडन: भारतात मागील काही दिवसांपासून करोनाबाधितांची संख्या वाढतच आहे. त्याचा परिणाम आता आंतरराष्ट्रीय स्तरावर दिसू लागला आहे. ब्रिटनने सोमवारी भारताचा समावेश लाल यादीत केला. ब्रिटनच्या आरोग्य मंत्रालयाने दिलेल्या आदेशानुसार, भारतात १० दिवस वास्तव्य केलेल्या व्यक्तिला ब्रिटनमध्ये प्रवेश दिला जाणार नाही.

ब्रिटनचे आरोग्य मंत्री मॅट हँकॉक यांनी हाऊस ऑफ कॉमन्समध्ये याबाबतच्या निर्णयाची माहिती दिली. त्यांनी सांगितले की, ब्रिटनमध्ये आतापर्यंत १०३ करोनाबाधितांमध्ये भारतीय वेरिएंट आढळले आहेत. यातील बहुतांशी लोकांचा संबंध आंतरराष्ट्रीय प्रवासाशी आहे. नव्या नियमांनुसार आता ब्रिटनचा नागरिक जर भारतातून पुन्हा मायदेशी आल्यास त्यांना १० दिवस क्वारंटाइन राहावे लागणार आहे.

वाचा: भारतासोबतची हवाई वाहतूक स्थगित; हाँगकाँगचा निर्णय

मॅट हँकॉक यांनी सांगितले की, नव्या वेरिएंटचे विश्लेषण करण्यात येत आहे. या नव्या वेरिएंटमध्ये वेगळं काय आहे, त्याचा वेगाने प्रसार का होतो आणि लस अथवा उपचाराचा फारसा परिणाम का होत नाही याबाबत विश्लेषण सुरू आहे.

ब्रिटनच्या या नव्या नियमांची अंमलबजावणी शुक्रवारपासून करण्यात येणार आहे. भारतात वाढत असलेल्या करोना संसर्गामुळे ब्रिटनचे पंतप्रधान बोरिस जॉन्सन यांनी भारत दौरा रद्द केला. पुढील आठवड्यात ते भारतात येणार होते.

वाचा: 'या' देशात ८० टक्के लसीकरण; एक वर्षानंतर मास्कपासून सुटका

पाकिस्तानकडूनही प्रवेश बंदी

पाकिस्तानने ही भारतातून येणाऱ्या प्रवाशांना दोन आठवडे प्रवेश बंदी लागू केली आहे. पाकिस्तानच्या नॅशनल कमांड अॅण्ड ऑपरेशन सेंटरचे (एनसीओसी) प्रमुख असद उमर यांच्या अध्यक्षतेखाली झालेल्या बैठकीत हा निर्णय घेण्यात आला आहे. पाकिस्तानने भारताचा समावेश 'सी' गटात करण्यात आला आहे. मागील आठवड्यात जवळपास ८१५ शीख भाविक बैसाखीनिमित्त भारतातून लाहोरमध्ये दाखल झाले होते. त्यांना १० दिवस राहण्याची परवानगी आहे.