अमेरिकेत करोनाचा कहर; एका दिवसात दोन लाखांहून अधिक बाधित आढळले

वॉशिंग्टन: अमेरिेकेत करोनाचे थैमान थांबण्याची चिन्ह दिसत नाहीत. अमेरिकेत करोनाबाधितांची संख्या सातत्याने वाढत आहे. अमेरिकेत एकाच दिवसात दोन लाख १० हजार नवीन करोनाबाधित आढळले आहेत. अमेरिकेत करोनाचा संसर्ग सुरू झाल्यानंतर एकाच दिवसात आढळलेल्या करोनाबाधितांची ही आतापर्यंतची सर्वाधिक संख्या आहे. जगभरात अमेरिकेत सर्वाधिक करोनाबाधित आहेत.

जॉन्स हॉपकिन्स विद्यापीठाने ही माहिती दिली. गुरुवारी मागील २४ तासांत दोन लाख १० हजार नवीन करोनाबाधितांची नोंद करण्यात आली. तर, दोन हजार ९०७ जणांचा मृत्यू झाला. अमेरिकेत करोनाबाधितांची एकूण संख्या एक कोटी ४० लाख झाली आहे. तर, मृतांची संख्या दोन लाख ५० हजारांहून अधिक झाली आहे.

वाचा: करोना: ब्रिटन पाठोपाठ रशियातही पुढील आठवड्यात लस देणार

अमेरिका, भारत आणि ब्राझील या देशांमध्ये करोनाचा सर्वाधिक संसर्ग फैलावला आहे. भारतात करोनाबाधितांची संख्या ९५ लाखांहून अधिक झाली असून एक लाख ३८ हजारजणांचा मृत्यू झाला आहे. भारतात ८९ लाखांहून अधिकजणांनी करोनाच्या संसर्गावर मात केली आहे.

वाचा: भांगेला औषध म्हणून संयुक्त राष्ट्राची मान्यता; 'या' मुद्यावर भारत-पाक एकत्र

अमेरिकेत फायजरने आपात्कालीन परिस्थितीत लस वापरासाठी मंजुरी देण्यासाठी अन्न आणि औषध प्रशासनाकडे अर्ज दाखल केला आहे. येत्या काही दिवसांत लशीबाबतच्या समितीची बैठक पार पडणार असून फायजरच्या लशीला मंजुरी मिळण्याची शक्यता आहे. तसे झाल्यास अमेरिकेत ११ किंवा १२ डिसेंबरपासून लस उपलब्ध होण्यास सुरुवात होईल असे संकेत व्हाइट हाउसमधून देण्यात आले आहेत. त्याशिवाय मॉडर्नानेही लस वापरासाठी अर्ज दाखल केला आहे. मॉडर्नाच्या लशीला परवानगी मिळण्याची शक्यता आहे. त्यामुळे नाताळापूर्वीच अमेरिकेत दोन लशींचा वापर सुरू होण्याची शक्यता आहे.

वाचा: लॉकडाउन हवा की नको? 'या' देशात मतदानाने झाला निर्णय

करोनाच्या दुसऱ्या लाटेचा सामना करणाऱ्या ब्रिटनने फायजरच्या लशीला मंजुरी दिली आहे. फायजरची करोना लस ९५ टक्के प्रभावी असल्याचे चाचणीत समोर आले होते. आता पुढील आठवड्यापासून लस उपलब्ध होणार असल्याची माहिती आहे. योग्य चाचणी केल्यानंतर लशीला मंजुरी देणारा ब्रिटन हा पहिला देश ठरला आहे. तर, दुसरीकडे रशियातही पुढील महिन्यापासून लशीकरण मोहीम सुरू होणार आहे. राष्ट्रपती पुतीन यांनी त्याबाबतचे निर्देश दिले आहेत.