Coronavirus vaccine: अमेरिकेत डिसेंबरमध्येच करोनाची उपलब्ध होणार!

न्यूयॉर्क: जगभरात करोनाबाधितांची संख्या वाढत असताना सगळ्यांचे लक्ष लशीवर लागले आहे. अमेरिकेतही करोनाबाधितांची संख्या एक कोटींहून अधिक झाली आहे. त्यामुळेच करोनाला अटकाव करणारी लस कधी उपलब्ध होईल, याची सगळेजण प्रतिक्षा करत आहेत. डिसेंबर महिन्यात अमेरिकेत लस उपलब्ध होण्याची दाट शक्यता निर्माण झाली आहे.

फायजरने विकसित केलेल्या लशीची तिसऱ्या टप्प्यातील चाचणी सुरू आहे. या चाचणीचे प्राथमिक निष्कर्ष समोर आले असून ही लस ९० टक्क्यांहून अधिक प्रभावी आणि सुरक्षित असल्याचे आढळून आले आहे. अमेरिकेचे आरोग्य मंत्री एलेक्स अजार यांनी सांगितले की, फायजर कंपनी आपल्या करोना लशीच्या तिसऱ्या टप्प्यातील चाचणीचे निष्कर्ष आरोग्य प्राधिकरणाला लवकरात लवकर सोपवू शकतात. अमेरिकन सरकारने लशीकरण मोहिमेची तयारी केली असल्याचे त्यांनी सांगितले. फायजर कंपनीने ही करोना प्रतिबंधक लस जर्मन कंपनी बायोएनटेकसोबत संयुक्तरीत्या विकसित केली आहे. सोमवारी, फायजरकडून चाचणीबाबत माहिती देण्यात आली. सुरुवातीच्या निष्कर्षानुसार, लशीचा पहिला डोस दिल्यानंतर २८ दिवसांत आणि दुसऱ्या डोसनंतर सात दिवसांमध्ये संबंधित व्यक्तिंमध्ये रोगप्रतिकारक शक्ती निर्माण झाली. तिसऱ्या टप्प्यातील चाचणीच्या पहिल्या भागात ही लस करोनाला अटकाव करण्यास प्रभावी ठरत असल्याचे निदर्शनास आले असल्याचे फायजरचे अध्यक्ष आणि सीईओ अल्बर्ट बोर्ला यांनी सांगितले.

वाचा: व्वा! 'या' देशात लोकसंख्येपेक्षाही अधिक करोना लशीचे डोस

वाचा: करोना: मस्तच! तिसऱ्या टप्प्यातील चाचणीत 'ही' लस ९० टक्क्यांहून अधिक प्रभावी

अजार यांनी सांगितले की, सरकारला दर महिन्याला फायजरने विकसित केलेली जवळपास दोन कोटी लशीचे डोस उपलब्ध होतील. अमेरिकन सरकार आणि फायजर यांच्यात लशीसंदर्भात १.९५ अब्ज डॉलरचा करार झाला असून ५० लाख नागरिकांसाठी लस उपलब्ध होणार आहे. लशीला मंजुरी देण्यासाठी चाचणीच्या डेटाची प्रतिक्षा असून त्यानंतर अन्न व औषध प्रशासन याबाबत निर्णय घेईल असेही त्यांनी सांगितले.

वाचा: विमानतळावर एक कर्मचारी करोनाबाधित; आठ हजारजणांची केली चाचणी

अजार यांनी सांगितले की, मॉडर्ना इंकसह इतर कंपन्यांकडून लस उपलब्ध होण्याची अपेक्षा आहे. या महिन्याच्या अखेरीस काही लस चाचणीचे प्राथमिक निष्कर्ष समोर येण्याची अपेक्षा असल्याचे त्यांनी म्हटले. लशीला मंजुरी मिळाल्यानंतर रुग्णालयात दाखल असलेले वृद्ध, आरोग्य कर्मचारी यांना प्राधान्य देण्यात येणार आहे. मार्च महिन्याच्या अखेरीस आणि एप्रिल महिन्यापर्यंत सर्व नागरिकांसाठी लस उपलबध होण्याची शक्यता त्यांनी व्यक्त केली.