Coronavirus updates करोनाचे थैमान सुरूच; बाधितांच्या संख्येने ओलांडला चार कोटींचा आकडा

वॉशिंग्टन: जगभरात करोना विषाणूचे थैमान सुरूच आहे. करोनाचा संसर्ग रोखण्यासाठी अद्यापही ठोस औषध किंवा लस विकसित झाली नाही. करोनाबाधितांची संख्या दिवसेंदिवस वाढत असल्यामुळे चिंता व्यक्त करण्यात येत आहे. जगभरात करोनाबाधितांच्या संख्येने चार कोटींचा आकडा ओलांडला आहे. करोनाबाधितांची संख्या यापेक्षाही अधिक असण्याची शक्यता तज्ज्ञांनी व्यक्त केली आहे. अनेक बाधितांमध्ये करोनाची लक्षणे आढळत नाहीत. त्याशिवाय अनेक देशांमध्ये करोना चाचणीदेखील कमी प्रमाणात होत आहे.

आतापर्यंत १० लाखांहून अधिकजणांचा मृत्यू

करोनाच्या आजारामुळे आतापर्यंत १० लाखांहून अधिकजणांचा मृत्यू झाला आहे. मृतांची संख्या यापेक्षाही अधिक असण्याची शक्यता आहे. जगभरातील अनेक देशांनी मृतांची संख्या वास्तविकपणे सांगितली नसल्याचाही दावा करण्यात येत आहे. त्याशिवाय या संख्येत करोनाची लक्षणे असलेल्या पण चाचणी न केलेल्या मृतांच्या संख्येचा समावेश नाही.

वाचा: करोना: चीनमध्ये लस विक्री सुरू; जाणून घ्या किंमत

वाचा: 'लशीमुळेही थांबणार नाही संसर्ग; करोनाचा फैलाव होत राहणार!'

अमेरिका, भारत आणि ब्राझीलमध्ये सर्वाधिक बाधित

अमेरिका, ब्राझील आणि भारतात करोनाबाधितांची संख्या अधिक असल्याचे नोंदवण्यात आली आहे. जॉन हापकिन्स विद्यापीठाच्या आकडेवारीनुसार, अमेरिकेत ८२ लाखांहून अधिक करोनाबाधित आढळले आहेत. तर, भारतात ७५ लाख ९७ हजार करोनाबाधित आहेत. ब्राझीलमध्ये ५२ लाख ५० हजार इतकी संख्या असून रशियात बाधितांच्या संख्येने १४ लाखांचा आकडा ओलांडला आहे. मागील काही आठवड्यांपासून युरोपमध्ये करोनाबाधितांची संख्या वाढत आहे. युरोपमध्ये करोनाची दुसरी लाट आल्याची परिस्थिती असून युरोपमध्ये करोनाबाधितांच्या संख्येत मोठ्या प्रमाणावर वाढ झाली आहे. युरोप खंडात करोनाच्या आजाराने दोन लाख ४० हजारजणांचे प्राण घेतले आहेत.

वाचा: गुड न्यूज! भारतात दाखल होणार 'ही' लस; चाचणी करण्यास मान्यता

वाचा: जाणून घ्या: जगभरातील ३ अब्ज लोकांपर्यंत का उशिरा दाखल होणार लस?

युरोपमध्ये बाधितांच्या संख्येत वाढ

युरोपमध्ये नव्याने करोनाबाधित मोठ्या संख्येने आढळत आहेत. यातील निम्मे बाधित हे ब्रिटन, फ्रान्स, रशिया आणि स्पेन या देशांमध्ये नोंदवण्यात आले आहेत. करोनाच्या वाढत्या संसर्गाला रोखण्यासाठी ब्रिटन आणि फ्रान्सला आपल्या देशांमध्ये नवीन निर्बंध लावण्यात आले आहे.