करोनाचे थैमान: मर्केल यांचे लशीबाबत मोठे वक्तव्य

बर्लिन: जगभरात करोनाचे थैमान सुरू अद्यापही सुरू आहे. युरोपीयन देशांमध्ये करोनाची दुसरी लाट आली आहे. काही देशांनी लॉकडाउनचे निर्बंध लागू केले आहेत. जर्मनीच्या चान्सलर एंजेला मर्केल यांनी लशीबाबत मोठे वक्तव्य केले आहे. नाताळापूर्वीच लस येणार असल्याची शक्यता त्यांनी व्यक्त केली. लशीमुळे करोनाचे संकट पूर्णपणे टळणार नसले तरी आशेचा एक किरण असल्याचे त्यांनी म्हटले.

करोनाच्या वाढत्या संसर्गामुळे जर्मनीत लॉकडाउनचे निर्बंध लागू करण्यात आले आहेत. मर्केल यांनी जर्मन नागरिकांना निर्बंधाबाबत संयम बाळगण्याचे आवाहन केले आहे. २० डिसेंबरपर्यंत करोनाचे निर्बंध वाढवण्याबाबत राज्यांच्या राज्यपालांनी सुचना केली होती. त्यांच्या सुचना मान्य केल्यानंतर मर्केल यांनी संसदेत आपले निवदेन मांडले. जनजीवन सुरळीत ठेवण्यासाठी प्रशासन सर्वतोपरी प्रयत्न करत आहे. लोकांना करोनाच्या संसर्गापासून वाचवण्यासह आरोग्य व्यवस्था सुरळीत सुरू राहील याकडेही ते लक्ष देत असल्याचे त्यांनी सांगितले. करोनाच्या संकटाशी दोन हात करण्यासाठी आरोग्य, अर्थव्यवस्था, सोशल डिस्टेंसिग, शिक्षण आदी सर्व बाबी महत्त्वाच्या असल्याचे त्यांनी सांगितले.

वाचा: लशीच्या परिणामकतेवर शंका: एस्ट्राजेनकाला 'स्पुटनिक'चा 'हा' प्रस्ताव

जर्मनीत करोनाचा थैमान सुरू आहे. दोन नोव्हेंबर रोजी लॉकडाउन करण्यात आले होते. त्यानंतर रेस्टोरंट्स, बार, स्पोर्ट्स आणि मनोरंजनाची सार्वजनिक स्थळे बंद करण्यात आली. तर, शाळा, दुकाने आणि हेअर सलून सुरू ठेवण्यात आले होते. जर्मनीत करोनाच्या संसर्गामुळे आतापर्यंत १५ हजारांहून अधिकजणांचा मृत्यू झाला आहे. तर, करोनाबाधितांचा आकडा १० लाखांच्या घरात पोहचला आहे. करोनाच्या संसर्गाला अटकाव करण्यासाठी लॉकडाउन जाहीर झाल्यानंतर नागरिकांनी त्याविरोधात आंदोलन केले.

वाचा:'या' देशात करोनाची चौथी लाट; डान्स क्लब ठरले सुपरस्प्रेडर!

दरम्यान, अमेरिकेत ११ किंवा १२ डिसेंबरपासून लशीकरण मोहिमेस सुरुवात होईल, असे व्हाइट हाउसच्यावतीने सांगण्यात आले. अमेरिकेच्या अन्न आणि औषध प्रशासनाच्या लशीबाबतच्या समितीची १० डिसेंबर रोजी बैठक होणार आहे. अमेरिकेतील करोना विषाणू लशीकरण मोहिमेचे प्रमुख डॉक्टर मोनसेफ स्लाउ यांनी सांगितले की, लशीकरणास मंजुरी मिळाल्यानंतर २४ तासांमध्ये लशीकरण केंद्रापर्यंत लस वितरीत करावी लागणार आहे. त्यामुळेच १० डिसेंबरच्या बैठकीत मंजुरी मिळाल्यास दोन दिवसांमध्ये ११ अथवा १२ डिसेंबर रोजी लशीकरण कार्यक्रम सुरू होईल, असे त्यांनी सांगितले