लशीच्या परिणामकतेवर शंका: एस्ट्राजेनकाला 'स्पुटनिक' निर्मात्यांचा दिला 'हा' प्रस्ताव

मॉस्को: ऑक्सफर्ड-एस्ट्राजेनकाने विकसित केलेल्या लस चाचणीच्या अंतरीम निष्कर्षावर प्रश्न उपस्थित करण्यात येत आहे. एका चुकीमुळे ऑक्सफर्ड-एस्ट्राजेनकाच्या लशीवर शंका घेण्यास सुरूवात झाली आहे. अशातच आता रशियन लस स्पुटनिक व्ही लस तयार करणाऱ्या गोमालिया इन्स्टिट्यूटने ऑक्सफर्ड-एस्ट्राजेनकाला एक प्रस्ताव सादर केला आहे. स्पुटनिक व्हीसह ऑक्सफर्डची लस दिल्यास परिणाम अधिक चांगले येतील असा दावा करण्यात आला आहे.

क्सफर्ड विद्यापीठ आणि एस्ट्राजेनकाने विकसित केलेल्या लशीवर प्रश्न उपस्थित होऊ लागल्यावर कंपनीने मोठा निर्णय घेतला आहे. करोना लशीची आणखी अतिरिक्त चाचणी करण्यात येणार असल्याचे एस्ट्राजेनकाचे सीईओ पास्कल सोरिओट यांनी जाहीर केले आहे. त्यावर स्पुटनिक व्हीच्या निर्मात्यांनी एस्ट्राजेनका नवीन लस चाचणी करत असणार तर त्यांची लस आणि स्पुटनिक व्हीच्या लशीचा डोस एकत्रपणे वापरला पाहिजे. यामुळे लस अधिकच प्रभावी होईल, असा दावा त्यांनी केला आहे. रशियन संस्थेच्या प्रस्तावावर एस्ट्राजेनकाने अद्याप कोणतीही प्रतिक्रिया व्यक्त केली नाही.

वाचा: लस चाचणी परिणामांवर संशय!; ऑक्सफर्ड-एस्ट्राजेनकाने घेतला 'हा' निर्णय

सोमवारी, एस्ट्राजेनकाने लस चाचणीचे अंतरीम निष्कर्ष जाहीर केले होते. लशीच्या डोसप्रमाणानुसार ही लस ९० टक्के अथवा ६२ टक्के प्रभावी ठरली असल्याचे सांगण्यात आले. ज्या डोस पॅटर्नने ९० टक्के लस प्रभावी असल्याचे सांगण्यात आले. त्यामध्ये स्वयंसेवकांना आधीच अर्धा डोस देण्यात आला होता. त्यानंतर महिनाभराने पूर्ण डोस देण्यात आला. विशेष म्हणजे दोन पूर्ण डोसचा पॅटर्न अधिक प्रभावी ठरला नसल्याचे समोर आले.

वाचा: करोना: ऑक्सफर्ड लस चाचणीत एक चूक ठरली वरदान

वाचा: 'या' देशात करोनाची चौथी लाट; डान्स क्लब ठरले सुपरस्प्रेडर!

वाचा: काय म्हणावं! करोना वॅक्सीन टुरिझम; टूर कंपनीचे खास पॅकेज

ऑक्सफर्डच्या लशीकडे सगळ्या जगाचे लक्ष लागले होते. फायजर, मॉडर्ना, स्पुटनिक व्हीच्या तुलनेते ही लस अधिक प्रभावी ठरू शकेल असा दावा करण्यात येत होता. मात्र, नुकत्याच समोर आलेल्या या चुकीमुळे लशीबाबत शंका निर्माण घेणे सुरू झाले आहे. एस्ट्राजेनकाला अनुभव नसल्याचा फटका बसला असल्याचे म्हटले जाते. एस्ट्राजेनकाची लस ही सर्वात स्वस्त आणि मोठ्या प्रमाणावर उत्पादित करता येणारी आहे. त्याशिवाय ही लस सहजपणे वितरीत करता येऊ शकते. मात्र, चाचणी दरम्यान झालेल्या एका चुकीमुळे या लशीवर प्रश्न उपस्थित करण्यात येत आहे.