Coronavirus Vaccine करोना: चीनला झटका! ब्राझीलच्या राष्ट्रपतींनी केली 'ही' घोषणा

रिओ दी जेनेरियो: ब्राझीलमध्ये करोनाचा संसर्ग सातत्याने वाढत आहे. तर, दुसरीकडे राष्ट्रपती जॅर बोल्सनारो यांनी आता मोठी घोषणा केली आहे. करोनाला अटकाव करण्यासाठी ब्राझील चीनकडून लस खरेदी करणार नसल्याची घोषणा त्यांनी केली आहे. विशेष म्हणजे काही दिवसांआधीच ब्राझीलच्या आरोग्यमंत्र्यांनी लशीकरण मोहिमेसाठी चीनची लस खरेदी करणार असल्याचे म्हटले होते. ब्राझीलमध्ये चिनी कंपनी सिनोवॅक लशीची तिसऱ्या टप्प्यातील चाचणी सुरू आहे.

राष्ट्रपती जॅर बोल्सनारो यांनी सोशल मीडियावर आपल्या एका समर्थकाच्या प्रश्नाला उत्तर देताना चिनी कंपनीची लस खरेदी करणार नसल्याचे स्पष्ट केले. या समर्थकाने राष्ट्रपती जॅर बोल्सनारो यांना चिनी लस खरेदी न करण्याची मागणी केली होती. त्याला उत्तर देताना बोल्सनारो यांनी सांगितले. चिनी लस बंदीबाबत येत्या काही दिवसात सविस्तरपणे भूमिका स्पष्ट करण्यात येईल असेही त्यांनी सांगितले.

वाचा: करोना लस चाचणीत एका स्वयंसेवकाचा मृत्यू; तरीही चाचणी सुरू राहणार!

मंगळवारी ब्राझीलचे आरोग्य मंत्री डुआर्डो पजुएलो यांनी राज्यपालांसोबतच्या एका बैठकीत लशीकरण मोहिमेबाबतची माहिती दिली. करोना लशीकरण मोहिमेसाठी ऑक्सफर्ड-एस्ट्राजेनकाची लशीशिवाय सिनोवॅकची लस खरेदी करणार असल्याचे त्यांनी म्हटले होते.

वाचा: ब्राझील: तिसऱ्या टप्प्यात 'ही' करोना लस आढळली सुरक्षित!

साओ पाओलेचे राज्यपाल जोओ डोरिया यांनी सांगितले की, जानेवारीत लशीकरण मोहीम सुरू करण्यासाठी डिसेंबर अखेरपर्यंत आरोग्य नियामक मंडळाची मंजुरी मिळण्याची शक्यता आहे. डोरिया यांनी आरोग्य मंत्र्यांसोबतच्या बैठकीनंतर चीनच्या सिनोवॅक लशीचे ४६ दशलक्ष डोस खरेदी करण्यावर सहमती दर्शवली होती. ब्राझील सरकारने याआधीच एस्ट्राजेनका आणि ऑक्सफर्ड विद्यापीठ विकसित करत असलेली लस खरेदी करण्यासाठी तयारी केली आहे. त्याशिवाय बायोमेडिकल रिसर्च सेंटर FioCruz मध्ये या लशीचे उत्पादन करण्याची तयारी सुरू केली आहे.

वाचा: काय सांगता...माउथवॉशमुळे करोनाचा विषाणू होऊ शकतो निष्क्रिय!

दरम्यान, चीनच्या सिनोवॅक बायोटेकने विकसित केलेल्या करोनावरील लशीची ब्राझीलमध्ये तिसऱ्या टप्प्यातील चाचणी सुरू आहे. सोमवारी या लशीचे प्रााथमिक परिणाम आणि निष्कर्ष जाहीर करण्यात आले. ही लस सुरक्षित असल्याचे सांगण्यात आले आहे. या चाचणीत ९ हजार स्वयंसेवक सहभागी झाले आहेत. ब्यूटनेटन इन्स्टिट्यूटचे महासंचालक डिमास कोवास यांनी सांगितले की करोनावॅक (CoronaVac)लशीची चाचणी संपूर्ण १३ हजार स्वयंसेवकांवर केली जात नाही. तोपर्यंत लस प्रभावी असल्यासंबंधीचा डेटा जाहीर करता येणार नाही.