Coronavirus vaccine प्रतिक्षा संपली! अमेरिकेत 'या' तारखेपासून लस देण्यास होणार सुरुवात

वॉशिंग्टन: अमेरिकेत करोनाचे थैमान सुरू असताना, दुसरीकडे चांगली बातमी समोर आली आहे. अमेरिकेत पुढील महिन्यापासून लस देण्यास सुरुवात करण्यात येणार असल्याचे व्हाइट हाउसकडून सांगण्यात आले आहे. अमेरिकेत मॉडर्ना आणि फायजर या कंपन्यांनी तिसऱ्या टप्प्यातील चाचणीत लस प्रभावी असल्याचे सांगितले होते. फायजर कंपनीने शुक्रवारीच लस वापरास परवानगी देण्यासाठी अर्ज दाखल केला आहे.

अमेरिकेत ११ किंवा १२ डिसेंबरपासून लशीकरण मोहिमेस सुरुवात होईल, असे व्हाइट हाउसच्यावतीने सांगण्यात आले. अमेरिकेच्या अन्न आणि औषध प्रशासनाच्या लशीबाबतच्या समितीची १० डिसेंबर रोजी बैठक होणार आहे. अमेरिकेतील करोना विषाणू लशीकरण मोहिमेचे प्रमुख डॉक्टर मोनसेफ स्लाउ यांनी सांगितले की, लशीकरणास मंजुरी मिळाल्यानंतर २४ तासांमध्ये लशीकरण केंद्रापर्यंत लस वितरीत करावी लागणार आहे. त्यामुळेच १० डिसेंबरच्या बैठकीत मंजुरी मिळाल्यास दोन दिवसांमध्ये ११ अथवा १२ डिसेंबर रोजी लशीकरण कार्यक्रम सुरू होईल, असे त्यांनी सांगितले.

वाचा: चांगली बातमी! मॉडर्ना, फायजरपेक्षाही स्वस्त असणार 'ही' लस

अमेरिकेत करोनाचे थैमान

अमेरिकेला करोना संसर्गाचा मोठा फटका बसला आहे. एक कोटींहून अधिकांना करोनाची बाधा झाली आहे. तर, दोन लाख ५५ हजार जणांचा करोनाच्या संसर्गाने मृत्यू झाला आहे. मागील काही दिवसांमध्ये करोनाबाधितांच्या संख्येत वाढ झाली आहे.

वाचा: पार्टीत दारू संपली म्हणून सॅनिटायझर प्यायले; सात जणांचा मृत्यू

वॉशिंग्टन विद्यापीठाच्या इन्स्टिट्यूट ऑफ हेल्थ मॅट्रिक्स अॅण्ड इव्हॅल्यूशनने जानेवारी महिन्याच्या मध्यापासून दररोज सरासरी २५०० बाधितांचा मृत्यू होण्याची भीती व्यक्त केली आहे. तर, १८ डिसेंबरनंतर दररोज २३०० अमेरिकन नागरिकांचा मृत्यू होण्याचा इशारा दिला आहे. अमेरिकेत करोनाच्या संसर्गामुळे मार्च महिन्यापर्यंत चार लाख ७१ हजारजणांचा मृत्यू होण्याची भीती व्यक्त करण्यात आली आहे. गुरुवारी अमेरिकेत ८० हजार ६०० करोनाबाधितांना रुग्णालयात दाखल करण्यात आले.

वाचा: काही दिवसांत येणार करोना लस; जाणून घ्या किंमत आणि इतर माहिती

दरम्यान, कोव्हिड रुग्णांची जगभरातील संख्या सहा पटीने अधिक असण्याची शक्यता ऑस्ट्रेलियन नॅशनल युनिव्हर्सिटी आणि मेलबर्न विद्यापीठातील संशोधकांनी केलेल्या पाहणीत व्यक्त करण्यात आली आहे. मार्च ते ऑगस्ट या कालावधीत १५ देशांमध्ये करोनाची लागण होण्याचा सरासरी दर ६.२ पट अधिक होता, असे पाहणीत आढळले आहे. ब्रिटन, फ्रान्स, बेल्जियम आणि इटलीत करोनाची लागण होण्याच्या दराची जी नोंद झाली त्यापेक्षा अधिक दर होता, असेही पाहणीतील निष्कर्षात म्हटले आहे.

वाचा: गुड न्यूज! भारताकडून 'इतक्या' कोटी करोना लशींची अॅडव्हान्स बुकिंग

इटलीत तर लागण होण्याचा दर १७ पटीने अधिक असल्याचे निष्कर्षात म्हटले आहे. एप्रिलअखेरीपर्यंत १५ देशांमध्ये ऑस्ट्रेलियात बाधितांची पातळी चांगली होती. मात्र, ऑगस्टअखेरपर्यंत लागण होण्याचा दर पाच पटींनी अधिक असावा असे यात म्हटले आहे. युरोपातील ११ देश, ऑस्ट्रेलिया, कॅनडा, दक्षिण कोरिया आणि अमेरिका मिळून किमान ८० कोटी लोकांना करोना झाला असावा असे निष्कर्षात नमूद करण्यात आले आहे.