करोना: 'या' लशीचे दोन नव्हे एकच डोस पुरेसा; संशोधनात दावा

लंडन: करोनाच्या संसर्गाला अटकाव करण्यासाठी अनेक देशांमध्ये विविध उपाययोजना आखण्यात येत आहेत. तर, दुसरीकडे लसीकरणावरही मोठ्या प्रमाणावर भर दिला जात आहे. करोनाच्या संसर्गापासून बचाव करण्यासाठी 'स्पुटनिक व्ही' या लशीचा एकच डोस पुरेसा असल्याचा दावा करण्यात आला आहे. एका संशोधनात हा दावा करण्यात आला आहे. याआधीच्या संशोधनानुसार स्पुटनिक व्ही लशीच्या दोन डोसमुळे ९२ टक्के रोगप्रतिकार शक्ती विकसित होत असल्याचे समोर आले होते.

स्पुटनिक व्ही लशीची निर्मिती ही दोन एडिनोव्हायरसने करण्यात आली आहे. हे विषाणू सर्दी, ताप, गळ्यात खवखवणे आदी आजारांसाठीही कारणीभूत असतात. नियतकालिक 'सेल रिपोर्ट मेडिसिन'मध्ये मंगळवारी प्रकाशित करण्यात आलेल्या एका संशोधनानुसार, लशीच्या दोन डोसपेक्षा एक डोस अधिक फायदेशीर ठरू शकतो. त्याशिवाय एकच डोस दिल्याने अधिकाधिक जणांचे लसीकरण होऊ शकते.

वाचा: अमेरिकेत धोक्याची घंटा; दररोज नोंद होणाऱ्या करोनाबाधितांचा आकडा दुप्पट
वाचा: भारतासाठी फायजर, मॉडर्ना लस पाठवण्याची अमेरिकेची तयारी, पण...

या संशोधनाचे लेखक आणि अर्जेंटिनातील ब्यूनस आयर्सचे फंडेसियन इंस्टीट्यूटो लेलोइर-कॉनिकेट’चे अॅण्ड्रिया गामार्निक यांनी सांगितले की, जगातील अनेक ठिकाणी मर्यादित लस पुरवठा आणि लशीचे असमान वितरण होत असल्याने समस्या निर्माण झाल्या आहेत. मात्र, या संशोधनातील निष्कर्षामुळे लसीकरणाला वेग येईल असा विश्वास त्यांनी व्यक्त केला.

वाचा: जॉन्सन अॅण्ड जॉन्सन लस घेतल्यास 'हा' धोका; अमेरिकन अधिकाऱ्यांचा इशारा

या नव्या संशोधन अभ्यासात संशोधकांनी २८९ आरोग्य कर्मचाऱ्यांवर स्पुटनिक व्ही लशीचा एक आणि डोस दिल्यानंतर निर्माण होणाऱ्या रोगप्रतिकारक शक्तीच्या क्षमतेची तुलना केली. पहिल्या डोसनंतर संशोधनात सहभागी झालेल्या ९४ टक्के जणांमध्ये विषाणू विरोधात ‘इम्युनोग्लोबुलिन जी (आईजीजी) अॅण्टीबॉडी’ विकसित झाली असल्याचे दिसून आले. त्यामुळे करोनाचा संसर्ग फैलावण्यास अटकाव होऊ शकतो.