कर्जवसुलीस मनाई, मोदीला अमेरिकेत दिलासा

वॉशिंग्टन : पंजाब नॅशनल बँकेत महाघोटाळा करणारा हिरे व्यापारी नीरव मोदीला अमेरिकेतील एका कोर्टाने दिलासा दिला आहे. मोदीची मालकी असलेल्या फायरस्टार डायमंड कंपनीकडून देणेकऱ्यांना कर्ज वसुली करण्यास कोर्टाने अंतरिम स्थगिती दिली आहे.

न्यूयॉर्कच्या सदर्न डिस्ट्रिक्टमधील दिवाला न्यायालयाने हे आदेश दिले आहेत. नीरव मोदीच्या या कंपनीने अनेकांकडून कर्ज घेतले होते. मात्र भारतातील त्याचा घोटाळा उघड झाल्यानंतर देणेकऱ्यांनी हे पैसे परत मिळविण्यासाठी मोदीकडे तगादा लावून कोर्टात धाव घेतली होती. तर अमेरिकेतील नादारी कायद्यांतर्गत संरक्षण मिळावे म्हणून फायरस्टार डायमंड इंकने कोर्टात याचिका दाखल केली होती. त्यावर सुनावणी करताना न्यायालयाने हे आदेश दिले.

कंपनीच्या संकेतस्थळावरील माहितीनुसार या कंपनीचे अमेरिका, युरोप, पश्चिम आशिया आणि भारतासहित अनेक देशात शाखा आहेत. पैशाच्या कमतरतेमुळेच अडचणी येत असल्याचा दावाही या कंपनीने केला आहे. कंपनीने न्यायालयात दाखल केलेल्या याचिकेत १० कोटी डॉलरच्या कर्जाचा उल्लेख केला आहे.