Coronavirus ट्रम्प म्हणतात, भारतात करोना ही मोठी समस्या!

वॉशिंग्टन: जगभरातील २०० देशांमध्ये करोनाच्या संसर्गाने थैमान घातले आहे. अमेरिकेत सर्वाधिक करोनाबाधित असून मृतांची संख्याही सर्वाधिक आहे. मात्र, करोनाविरोधात अमेरिकेत खूपच चांगले काम होत असल्याचे राष्ट्राध्यक्ष डोनाल्ड ट्रम्प यांनी म्हटले आहे. तर, भारतात करोना ही खूप मोठी समस्या असल्याचे त्यांनी म्हटले.

एकाच दिवसात भारतात ५२ हजार ५० नवीन करोनाबाधित रुग्ण आढळले. त्यामुळे देशातील करोनाबाधितांची संख्या ही १८ लाख ५५ हजार ७४५ इतकी झाली. अमेरिकेपेक्षाही भारतात सर्वाधिक रुग्ण आढळले. या पार्श्वभूमीवर ट्रम्प यांनी हे विधान केले आहे. ट्रम्प यांनी पत्रकारांशी संवाद साधताना म्हटले की, अमेरिकेत आपण खूपच चांगले काम करत आहोत. ज्या देशांनी करोनावर नियंत्रण मिळवले असे म्हटले जात होते. त्या देशांमध्ये सध्या नवीन करोनाबाधित रुग्णांची संख्या अधिक आहे. अमेरिकेने करोनावर खूप काम केले आहे. यावेळी ट्रम्प यांनी चीनवरही निशाणा साधला. चीनमध्ये करोनाबाधितांची संख्या वाढत आहे. भारतातही करोनाची मोठी समस्या आहे. अन्य देशांमध्येही करोनाची समस्या आहे. अन्य देशांमध्ये अमेरिकेपेक्षा मोठ्या संख्येने करोनाबाधित आढळत असल्याचे ट्रम्प यांनी सांगितले.

वाचा: मस्तच! दुबई विमानतळावर श्वान करतात करोना चाचणी

वाचा: करोनाची भीती! 'या' देशातील नागरिकांनी २.२५ ट्रिलियन नोटा जाळल्या

अमेरिकेत करोनाचा सर्वाधिक हाहाकार माजला आहे. अमेरिकेत ४७ लाखांहून अधिकजणांना करोनाची बाधा झाली आहे. तर, एक लाख ५५ हजारांहून अधिक जणांचा मृत्यू झाला आहे. अमेरिकेत सहा कोटी नागरिकांची करोना चाचणी झाली असल्याचा दावा ट्रम्प यांनी केला आहे. एवढ्या मोठ्या प्रमाणावर कोणत्याच देशाने करोनाची चाचणी केली नसल्याचा दावा त्यांनी केला.

वाचा: ऐकावे ते नवलच! तंबाखूपासून बनवली करोनाची लस, मानवी चाचणी सुरू होणार

दरम्यान, जगभरात करोनाचे थैमान सुरूच असून एक कोटी ४८ लाख जणांना करोनाची बाधा झाली आहे. तर, सहा लाख ९८ हजार जणांना करोनाच्या आजारामुळे प्राण गमवावे लागले आहे. करोनाच्या आजारावर एक कोटी १७ लाख जणांनी मात केली आहे. सध्या ६० लाख ७६ हजारजणांवर उपचार सुरू आहे. अमेरिका, ब्राझीलनंतर सर्वाधिक मृत्यू मेक्सिकोमध्ये नोंदवण्यात आले आहेत.