करोनाशी लढा: वयस्करांसाठी 'ही' लस ठरणार संजीवनी!

वॉशिंग्टन: करोनाच्या संसर्गाला अटकाव करण्यासाठी जगभरात प्रयत्न केले जात आहे. काही लशींची तिसऱ्या टप्प्यातील चाचणी सुरू आहे. अमेरिकेतील मॉडर्ना (Moderna Inc)कंपनीने विकसित केलेल्या लशीची चाचणी सुरू आहे. मॉडर्नाने या लस चाचणीशी संबंधित माहिती प्रसिद्ध केली असून लस उपलब्ध होण्याच्या प्रयत्नाच्या दिशेने वाटचाल सुरू झाली आहे. लस दिलेल्या वयस्कर मंडळींमध्ये रोगप्रतिकारक शक्ती निर्माण झाले असल्याचे निष्पन्न झाले आहे.

कंपनीने एका निवेदनाद्वारे लस चाचणीबाबतची माहिती दिली आहे. या लस चाचणीचे परिणाम वाढवणारे असल्याचे सांगण्यात आले आहे. लशीचे परिणाम युवकांमध्ये अधिक चांगल्या प्रमाणात दिसून येतात. मात्र, वृद्ध, वयस्कर मंडळींमध्ये याचे प्रमाण कमी असते. मॉडर्नाच्या लशीचे सकारात्मक परिणाम वृद्ध, वयस्करांमध्ये दिसून आले आहेत. चाचणीमध्ये ५५ वर्षांवरील व्यक्तींच्या शरीरातील अॅण्टी बॉडी ह्या युवकांच्या शरीरात असणाऱ्या प्रमाणात होत्या. अमेरिकेच्या सेंटर्स फॉर डिजीज कंट्रोल अॅण्ड प्रिवेंशनच्या समितीसमोर या चाचणीची माहिती देण्यात आली आहे. ही चाचणी २० जणांवर करण्यात आली.

वाचा: करोना: रशिया सुस्साट! पुढील महिन्यात आणखी एका लशीला मंजुरी देणार

मॉडर्ना विकसित करत असलेल्या लशीची चाचणी तिसऱ्या आणि अंतिम टप्प्यात दाखल झाली आहे. ही लस देण्यात येत आलेल्या व्यक्तींना कोणतेही गंभीर साइड इफेक्टस जाणवले नाहीत. मात्र, काही थंडी वाजणे, थकवा जाणवणे, यासारख्या तक्रारी काहींनी केल्या आहेत.

वाचा: चीनला नडणाऱ्या 'या' देशाने विकसित केली लस; साइड इफेक्टसही नाहीत

याआधी ही लस युवकांना फायदेशीर ठरत असून त्यांच्या शरीरात करोनाविरोधात अॅण्टीबॉडी तयार होत असल्याचे समोर आले होते. करोनाची बाधा होण्याचा सर्वाधिक धोोका हा वयस्कर व्यक्तींना अधिक असतो. त्यामुळे वयस्कर, वृद्ध व्यक्तींना लशीचा फायदा झाला पाहिजे याकडे कंपनीचा कटाक्ष होता. त्यात आता यश आले असल्याचे दिसत आहे.

वाचा: फक्त 'कोविड-१९'च नव्हे तर सर्वच करोना विषाणूंवर लस येणार!

अमेरिकेत इतरही काही कंपन्यांनी लस चाचणी सुरू केली आहे. मात्र, मॉडर्ना कंपनीची लस सर्वात आधी येईल अशी अपेक्षा आहे. अमेरिकन सरकारने या लशीसाठी निधी दिला असून डोस खरेदीचा करार केला आहे. अमेरिकेत करोनाबाधितांची संख्या वाढत आहे. अमेरिकेच्या निवडणुकीत करोनाच्या मुद्यावर आरोप-प्रत्यारोप सुरू आहे.