पेट्रोल-डिझेलच्या किंमती लवकरच वाढणार!

मटा ऑनलाइन वृत्त । दुबई

जर तुम्ही दुचाकी, चारचाकी वापरत आहात तर तुमच्यासाठी वाईट बातमी आहे. पेट्रोल-डिझेलच्या किंमती येत्या काही दिवसात वाढणार आहोत. तेल उत्पादक देशांपैकी एक सौदी अरेबियाचे क्राउन प्रिंस मोहम्मद बिन सलमान यांनी मार्च २०१८ पर्यंत पुरवठा आणि उत्पादनात कपात करण्याचं समर्थन केलं आहे. परिणामी येत्या काही दिवसात कच्च्या तेलाचे भाव आणखी वाढू शकतात.

सध्या कच्च्या तेलाची किंमत आंतरराष्ट्रीय बाजारात ६० डॉलर प्रति बॅरलपर्यंत पोहोचली आहे. पुरवठा कमी झाल्यात त्याचा परिणाम भारतातल्या पेट्रोल-डिझेलच्या किंमतींवरही होऊ शकतो. कारण भारतात इंधनाच्या किंमती आंतरराष्ट्रीय बाजारानुसार दर दिवशी बदलतात. ३० नोव्हेंबरला होणाऱ्या ओपेक (इंधन निर्यातदार देशांची संघटना) च्या बैठकीत पुन्हा एकवार कच्च्या तेलाचे उत्पादनात कमी करण्यावर एकमत होऊ शकतं, असे संकेत प्रिंस मोहम्मद यांच्या या वक्तव्यामुळे मिळाले आहेत, अशी माहिती वॉल स्ट्रीट जर्नलने दिली आहे.

तेल उत्पादक देशांचा समूह असलेल्या ओपेकमध्ये १४ देशांचा समावेश आहे. त्यात सौदी अरेबिया अधिक मोठा आणि प्रभावशाली आहे.