वृत्तसंस्था, डेहराडून
उत्तराखंडमधील भाजपचे वादग्रस्त आणि निलंबित आमदार कुंवर प्रणवसिंह चॅम्पिअन पुन्हा एकदा चर्चेत आले आहेत. हातात दारूचा ग्लास आणि बंदूक घेऊन बॉलिवूडच्या गाण्यावर डान्स केल्याने ते सध्या चर्चेत आले आहेत. त्यांचा हा व्हिडिओ व्हायरल झाला आहे. बेशिस्त आणि गैरवर्तवणुकीमुळे आधीच ते पक्षातून निलंबित आहेत.
व्हायरल झालेल्या व्हिडिओत प्रणवसिंह हातात बंदूक घेऊन नाचताना दिसत आहेत. या वेळी ते अश्लिल भाषेचा वापर करत आहेत. मिळालेल्या माहितीनुसार, पायाचे ऑपरेशन यशस्वीपणे पार पडल्यानंतर प्रणवसिंह आपल्या घरी परतले होते. आपल्या समर्थकांसह याचाच आनंद ते साजरा करीत होते. नाचताना प्रणवसिंह यांनी चार बंदुका हातात घेतल्या होत्या.
कुंवर यांना गैरवर्तवणुकीवरून तीन महिन्यांपूर्वीच भाजपमधून निलंबित करण्यात आले आहे. नवी दिल्लीतील उत्तराखंड निवासमध्ये एका पत्रकाराला धमकावल्याप्रकरणी भाजपने कुंवर यांच्यावर कारवाई केली होती. व्हिडिओमध्ये त्यांचे समर्थक प्रणवसिंह यांचे कौतुक करताना ऐकू येत आहे. 'उत्तराखंडमध्ये हे फक्त तुम्हीच करू शकता,' असे ते म्हणत आहेत. आपल्या समर्थकांना उत्तर देताना 'फक्त उत्तराखंड नाही, तर संपूर्ण भारतात असे कोणी करू शकत नाही,' असे ते म्हणत आहेत.
गंभीर दखल
भाजपने प्रणवसिंह यांच्या व्हिडिओची गांभीर्याने दखल घेतली आहे. सध्या त्यांच्यावर तीन महिन्यांच्या निलंबनाची कारवाई करण्यात आली आहे. चर्चा करून काय कारवाई करता येईल यासंबंधी निर्णय घेण्यात येणार आहे. उत्तराखंडचे भाजप प्रदेशाध्यक्ष नरेश बन्सल यांनी या प्रकरणी कारवाईचे सूतोवाच केले आहे.