दरीतील उडीचे लाइव्ह स्ट्रिमिंग करताना मृत्यू

मटा ऑनलाइन वृत्त । केंडरस्टेंग (स्वित्झर्लंण्ड)

युरोपमधील सर्वांत उंच अशा आल्प्स पर्वतांमध्ये एक खतरनाक स्टंट करताना एका इटालियन विंगसूट पायलटचा मृत्यू झाला. विंगसूट घालून आल्प्स पर्वतरांगामधील दरीमध्ये हजारो फुटांवरून उडी घेणाऱ्या अरमीन शमेर्दचा मृत्यू फेसबुकवरील लाइव्ह ब्रॉडकास्टमध्ये रेकॉर्ड झाला आहे.

'डेली मेल' या वृत्तपत्राने दिलेल्या बातमीनुसार अरमीनने डोंगरावरून दरीमध्ये उडी मारण्याआधी आपल्या फॉलोअर्सना 'आज तुम्ही माझ्या बरोबर उडणार आहात' असं आनंदानं सांगितलं होतं. पण दुर्दैवाने तेच त्याचे अखेरचे शब्द ठरले. अगदी विंगसूट घालण्यापासून ते आपल्या उडीबाबत संपूर्ण माहिती देताना अरमीन या व्हिडिओमध्ये दिसतो. चाहत्यांना बाय करून दरीमध्ये उडी मारल्यानंतर लगेचच अरमीन कुठल्या तरी खडकाला आदळल्याचे त्याच्या विव्हळण्याच्या आवाजावरून कळते.

अरमीनने उडी मारल्यानंतर काही सेंकदातच व्हिडिओ बंद झाला. या रेकॉर्डिंगमध्ये फक्त अरमीनची किंकाळी आणि विव्हळणं ऐकू येतं. त्याचा हा आवाज आल्यानंतर फेसबुकवर लाइव्ह ब्रॉडकास्ट पाहणाऱ्या अनेकांनी कमेन्ट करून त्याची चौकशी केली; मात्र त्यांना काहीच उत्तर मिळाले नाही. व्हिडिओचे ब्रॉडकास्टिंग बंद होताना फक्त गाईच्या गळ्यातील घंटांचा आवाज येतो.

२८ वर्षीय अरमीनचा मृतदेह स्वित्झर्लंडच्या केंडरस्टेंग या लोकप्रिय बेस जंप डेस्टिनेशनजवळ सापडला. जमिनीवर जोरात आदळल्याने अरमीनचा जागीच मृत्यू झाल्याचा अंदाज पोलिसांनी व्यक्त केला आहे. काही दिवसापूर्वीच लोकप्रिय विंगसूट जंपर एलेक्झांडर पोल्ली याचाही अशाच प्रकारच्या एका दुर्घटनेमध्ये मृत्यू झाला होता.