रिपब्लिकनची उमेदवारी ट्रम्प यांनाच

मटा ऑनलाइन वृत्त । वॉशिंग्टन

अमेरिकेच्या राष्ट्राध्यक्षपदाच्या निवडणुकीसाठी रिपब्लिकन पक्षाचे उमेदवार म्हणून डोनाल्ड ट्रम्प यांच्या नावाची आज अधिकृत घोषणा करण्यात आली. रिपब्लिकन पक्षाच्या या घोषणेनंतर आता राष्ट्राध्यक्षपदासाठी ट्रम्प आणि डेमोक्रॅटिक पक्षाच्या उमेदवार हिलरी क्लिंटन यांच्यात होणार आहे.

अमेरिकेच्या राष्ट्राध्यक्षपदासाठी येत्या ८ नोव्हेंबर रोजी निवडणूक होणार आहे. डेमॉक्रॅटिक पक्षाकडून हिलरी क्लिंटन यांची उमेदवारी जवळपास निश्चित मानली जात आहे. पुढील आठवड्यात त्यांच्या नावाची अधिकृत घोषणा होण्याची शक्यता आहे. रिपब्लिकन पक्षानं मात्र यात आघाडी घेत आज अपेक्षेनुसार ट्रम्प यांच्या नावावर शिक्कामोर्तब केलं. अध्यक्षपदाच्या उमेदवारीसाठी रिपब्लिकन पक्षाकडून तब्बल १६ इच्छुक होते. मात्र, ट्रम्प यांनी या सर्वांना धोबीपछाड देत पक्षाची उमेदवारी पटकावली. त्यांना इतर इच्छुकांपेक्षा १,२३७ मतं अधिक मिळाली.

अपेक्षाभंग करणार नाही!

रिपब्लिकन पक्षाकडून अध्यक्षपदासाठी उमेदवारी जाहीर होताच ‘अमेरिका फर्स्ट’ असं ट्विट करत ट्रम्प यांनी आपल्या भावना व्यक्त केल्या. 'रिपब्लिकन पक्षाकडून राष्ट्राध्यक्षपदाचा उमेदवार म्हणून नाव घोषित होणे हा माझा सन्मान समजतो. मी प्रचंड मेहनत करेन आणि तुमची मान झुकू देणार नाही,’ अशी प्रतिक्रिया त्यांनी दिली.

आधी विरोध, मग पाठिंबा

क्लेव्हलँड येथे सध्या रिपब्लिकन पक्षाचे अधिवेशन सुरू आहे. त्यात उमेदवार निवडीबद्दल चर्चा झाली. ट्रम्प यांच्या वक्तव्यांमुळं पक्षाचं नुकसान होत आहे, असं म्हणत सुरुवातीला अनेकांनी त्यांच्या उमेदवारीला विरोध दर्शवला. तसंच, ट्रम्प यांच्या पत्नी मलानिया यांनी मिशेल ओबामा यांच्या २००८च्या भाषणातील मुद्दे चोरून भाषण केल्याचेही यावेळी निदर्शनास आणले गेले. असं असतानाही शेवटच्या क्षणी सर्वांनी आपला विरोध मागे घेत ट्रम्प यांच्या उमेदवारीला पाठिंबा दिला. ट्रम्प यांची चारही मुलं यावेळी राज्याचे प्रतिनिधी म्हणून उपस्थित होती. ट्रम्प यांच्या नावाची अधिकृत घोषणा होताच त्यांनी वडलांचं अभिनंदन केलं. ट्रम्प यांच्या विजयासाठी पक्षाकडून ‘सिटीझन्स फॉर ट्रम्प‘ ही मोहिम सुरू करण्यात आली आहे.