‘ब्रेक्झिट’वर पुन्हा मतदानाची मागणी

लंडन : युरोपीय संघातून ब्रिटनने बाहेर पडण्याच्या (ब्रेक्झिट) निर्णयावर पुन्हा एकदा मतदान घेण्यात यावे, या मागणीसाठी शनिवारी लंडनमध्ये हजारोंच्या संख्येने लोक रस्त्यावर उतरले होते. 'ब्रेक्झिट'ला विरोध करणाऱ्या नागरिकांनी या वेळी संसदेवर मोर्चा काढला आणि पुन्हा एकदा या निर्णयासाठी 'लोकांचे मतदान' व्हावे, अशी मागणी केली. पंतप्रधान थेरेसा मे यांनी पुनर्मतदानाच्या मागणीचा विचार करावा, अशी अपेक्षाही व्यक्त करण्यात आली. ब्रिटन युरोपीय संघातून बाहेर पडण्याच्या (ब्रेक्झिट) घटनेला दोन वर्षे पूर्ण झाली, त्यानिमित्त हा मोर्चा काढण्यात आला होता.

'ब्रेक्झिटमुळे आमचे मोठ्या प्रमाणावर नुकसान झाले,' अशा भावना या वेळी नागरिकांनी व्यक्त केल्या. चायरा लिडौरी यांनी सांगितले, की 'ब्रेक्झिट'ची घटना घडली, तेव्हा मला खूप रडू आले होते. आपले भविष्य अंधारात आहे, अशी माझी भावना झाली होती. एमली हिल या ५५ वर्षीय महिलेने 'ब्रेक्झिट'ला आपला विरोध दर्शवला. त्या म्हणाल्या, ''ब्रेक्झिट' भीषण होते. 'ब्रेक्झिट'च्या बाजुने तेव्हा अनेकांनी मतदान केले असले, तरी ते या देशातील बहुमत होते, असे मला वाटत नाही.'