वृत्तसंस्था, वॉशिंग्टन
पाकिस्तानचे परराष्ट्रमंत्री शाह मेहमूद कुरेशी यांनी त्यांच्या अमेरिका दौऱ्यामध्ये अमेरिकेचे परराष्ट्रमंत्री माइक पोम्पिओ यांच्याशी चर्चा केली. या भेटीमध्ये दक्षिण आशियातील सुरक्षा आणि स्थैर्यासाठी कटीबद्ध असल्याचे कुरेशी यांनी सांगितले. तर, या भेटीमध्ये अफगाणिस्तान आणि पश्चिम आशियातील परिस्थितीवरही चर्चा केल्याचे ट्विट कुरेशी यांनी केले आहे.
कुरेशी हे दोन दिवसांच्या अमेरिका दौऱ्यावर आहेत. पोम्पिओ यांच्याबरोबरील चर्चेमध्ये अमेरिका-पाकिस्तान संबंधांवर चर्चा केली. दोन्ही देशांच्या परस्पर हिताच्या मुद्द्यांचा यामध्ये समावेश होता. व्यापार आणि गुंतवणूक या गोष्टींच्या महत्त्वावरही चर्चा झाल्याचे कुरेशी यांनी ट्विट केले आहे. कुरेशी यांनी काश्मीरवरून निष्कारण राळ उठवण्याचाही प्रयत्न केला. संयुक्त राष्ट्रांमधील ठराव आणि काश्मिरी जनतेच्या इच्छेप्रमाणे तोडगा निघत नाही, तोपर्यंत दक्षिण आशियामध्ये शांतता येणार नाही, असा जावईशोधही त्यांनी लावला.