निवडणूक निकाल फिरवण्यासाठी ट्रम्प जेव्हा याचना करत होते...

वॉशिंग्टन: अमेरिकेच्या अध्यक्षपदाची निवडणूक होऊन महिला उलटला असला तरी त्याविषयची चर्चा अद्याप थांबलेली नाही. माजी अध्यक्ष डोनाल्ड ट्रम्प यांनी पुन्हा निवडून येण्यासाठी किती आटापिटा चालवला होता, याच्या सुरस कहाण्या आता बाहेर येऊ लागल्या आहेत. 'वॉशिंग्टन पोस्ट' या आघाडीच्या दैनिकानं एक ऑडिओ संभाषण प्रसिद्ध करत ट्रम्प यांची पोलखोल केली आहे.

अमेरिकेच्या अध्यक्षपदासाठी नोव्हेंबर महिन्यात झालेली निवडणूक अत्यंत अटीतटीची होती. या निवडणुकीचा निकाल बराच रखडला होता. माजी अध्यक्ष ट्रम्प हे अखेरपर्यंत स्वत:च्या विजयाचा दावा करत होते. त्यामागचं इंगित आता उघड झालं आहे. मतमोजणी सुरू असताना पारडं आपल्याकडं कसं फिरेल यासाठी ते प्रयत्नशील होते. जॉर्जिया राज्याचा निकाल विरोधात जात असल्याचं दिसताच ट्रम्प सक्रिय झाले होते. त्यांनी जॉर्जियाचे सचिव व निवडणूक अधिकारी ब्रॅड राफेन्सपर्जर यांना फोन करून निकाल फिरवण्यासाठी त्यांच्यावर दबाव आणला होता.

वाचा: अमेरिेकेच्या सैनिकांना मारणाऱ्यांना बक्षिसे! चीनचा कुटील डाव?

'वॉशिंग्टन पोस्ट' यांनी ट्रम्प आणि राफेन्सपर्जर यांच्यात झालेल्या संभाषणाचा सारांश कालच्या अंकात प्रसिद्ध केला आहे. त्यानुसार, ट्रम्प हे कधी राफेन्सपर्जर यांच्याकडं गयावया करत होते तर कधी त्यांना थेट धमकी देत होते. गंभीर परिणामांना सामोरं जावं लागेल, अशी धमकी ट्रम्प यांनी राफेन्सपर्जर यांना दिली होती. तब्बल एक तास हे संभाषण सुरू होते. मात्र, राफेन्सपर्जर व त्यांच्या कार्यालयातील अधिकाऱ्यानं स्पष्ट शब्दांत हा दबाव झुगारून लावला. हे निष्पक्षपाती निवडणुकांच्या तत्त्वाच्या विरोधात आहे, असं त्यांनी ट्रम्प यांना बजावलं. त्यामुळं ट्रम्प यांचा डाव फसला होता. ट्रम्प यांच्या कार्यालयानं या वृत्तावर प्रतिक्रिया देण्यास नकार दिला आहे.

'वॉशिंग्टन पोस्ट'नं ऑनलाइन प्रसिद्ध केलेल्या या संभाषणाचा काही भाग:

ट्रम्प: 'जॉर्जियाचे लोक भडकलेत. देशातल्या लोकांच्या मनातही संताप आहे. मी सांगतोय ते करा. आम्ही फेरमोजणी केली आणि त्यात निकाल बदलला असं तुम्हाला सांगता येईल. त्यात काहीच चुकीचं नाही. मला ११,७८० मतं हवी आहेत. आपल्याला मिळालेल्या मतांपेक्षा केवळ एक मत जास्त हवं आहे. कारण, आपण हे राज्य जिंकलोय. कुठल्याही परिस्थितीत मला हे राज्य गमवायचं नाही.'

वाचा: माजी मंत्री व काँग्रेस नेते विलासकाका पाटील उंडाळकर यांचं निधन