पाहा: ट्रम्प समर्थकांचा अमेरिकन संसदेत राडा; जगाला धक्का

कॅपिटल हिल इमारतीबाहेर ट्रम्प समर्थक मोठ्या संख्येने जमले होते. त्यावेळी त्यांच्यात आणि पोलिसांमध्ये झटापटही झाली. अनेक ट्रम्प आंदोलक संसदेत घुसण्यात यशस्वी झाले. त्यामुळे मोठा गोंधळ उडाला. अमेरिकेतील स्थानिक वेळ दुपारी दोन वाजण्याच्या सुमारास एरिजोना राज्यातील इलेक्टोरल मतदानाच्या मुद्यावर चर्चा सुरू होती. त्याच वेळी ट्रम्प समर्थक संसदेत घुसले असून सिनेट सभागृहाच्या बाहेर असल्याचे खासदारांना समजले. त्यानंतर ही चर्चा थांबवण्यात आली. ट्रम्प समर्थकांनी संसदेत जोरदार घोषणाबाजी केली. या ट्रम्प समर्थकांना रोखण्यासाठी सुरक्षा यंत्रणांना बंदुका रोखाव्या लागल्या.

हिंसाचाराच्या घटनेदरम्यान ट्विटरने डोनाल्ड ट्रम्प यांचे ट्विटर अकाउंट बुधवारी १२ तासांसाठी बंद केले. ट्रम्प यांच्याकडून सातत्याने खोटी माहिती देणारे, दिशाभूल करणारे ट्विट करण्यात येत होते. त्यानंतर ट्विटरने हे पाउल उचलले. त्याआधी ट्विटर, फेसबुक आणि युट्युबने डोनाल्ड ट्रम्प यांच्या भाषणाचे सर्व लहान व्हिडिओ डिलीट केले. या व्हिडिओमध्ये ट्रम्प आपल्या समर्थकांना घरी जाण्याचे आवाहन करत आहेत. मात्र, त्यातही राष्ट्राध्यक्षपदाच्या निवडणुकीत गैरप्रकार झाल्याचा आरोप त्यांच्याकडून करण्यात येत होता. हे व्हिडिओ ट्रम्प समर्थक संसदेत घुसल्यानंतर दोन तासांनी पोस्ट करण्यात आले होते.

राष्ट्राध्यक्षपदी निवड झालेले जो बायडन यांनी या घटनेवर संताप व्यक्त केला. संविधानाचे संरक्षण करण्याचे आवाहन डोनाल्ड ट्रम्प यांना केले. अमेरिकेच्या संसदेत झालेला प्रकार निंदनीय असून कायदा, संविधान न मानणाऱ्यांची संख्या कमीच असल्याचे त्यांनी म्हटले. असे प्रकारचा गोंधळ हा देशद्रोह असल्याचे बायडन यांनी म्हटले. तर, अमेरिकेतील डेमोक्रॅटीक पक्षाचे नेते बर्नी सँडर्स यांनीदेखील ट्रम्प यांच्यावर टीकास्त्र सोडले. ७० लाख मतांनी पराभूत झालेले राष्ट्राध्यक्ष फेक न्यूजच्या आधारे गृह युद्धाची तयारी करत असल्याचा गंभीर आरोप त्यांनी केला. रिपब्लिक पक्षाच्या नेत्यांनीही या प्रकाराबद्दल संताप व्यक्त केला आहे.

या हिंसाचारात एका महिलेचा मृत्यू झाला असून अनेकजण जखमी झाले आहेत. ट्रम्प समर्थकांची संख्या मोठी होती. त्यांच्या तुलनेत पोलिसांची संख्या कमी होती. त्याच्यामुळेच ट्रम्प समर्थकांनी संसदेत घुसखोरी करण्यास यश मिळवले. ट्रम्प समर्थकांनी संसदेत घुसखोरी केली. त्यावेळी इलेक्टोरल मतदान मोजण्याची प्रक्रिया सुरू होती. सुरक्षा दलाच्या जवानांनी तातडीने संसदेचे सभागृह बंद केली. उपराष्ट्रपती माइक पेन्स आणि अन्य खासदारांना सुरक्षित स्थळी नेण्यात आले. वॉशिंग्टनमध्ये संचार बंदीची घोषणा करण्यात आली आहे. जगभरातील नेत्यांनी या घटनेवर चिंता व्यक्त केली आहे.