अमेरिकेतील ३ लाख भारतीय गोत्यात?

मटा ऑनलाइन वृत्त । वॉशिंग्टन

अमेरिकेचे अध्यक्ष डोनाल्ड ट्रम्प यांनी अनिवासी नागरिकांबाबत जो सख्त आदेश जारी केला आहे त्याचा फटका अमेरिकेत वास्तव्य करत असलेल्या भारतीय वंशाच्या सुमारे ३ लाख नागरिकांना बसू शकतो, अशी भीती व्यक्त करण्यात येत आहे.

अमेरिकेत अन्य देशांतील सुमारे १.१ कोटी नागरिक वास्तव्याला आहेत. ट्रम्प सरकारच्या ताज्या दिशानिर्देशांमुळे या सर्वांच्याच पोटात गोळा उठला आहे. ज्या नागरिकांकडे वैध दस्तावेज नसतील अशा नागरिकांवर कठोर कारवाई करण्याचे स्पष्ट निर्देश या आदेशात देण्यात आले आहेत. याबाबत अमेरिकेच्या डिपार्टमेंट ऑफ होमलँड सिक्युरिटीने एक मेमो जारी केला असून अवैध नागरिकांना देशाबाहेर काढताना एखादा वर्ग वा श्रेणी अशी कोणत्याही प्रकारची मुभा दिली जाऊ नये, असे त्यात नमूद केले आहे.

ज्या अनिवासींनी इमिग्रेशन कायद्याचं उल्लंघन केल्याचा संशय आहे अशा अनिवासींना अटक करण्याचा व त्यांची चौकशी करण्याचा इमिग्रेशन अधिकाऱ्यांना पूर्ण अधिकार आहे, असेही स्पष्ट करण्यात आले आहे.

दरम्यान, या दिशानिर्देशांत अवैध अनिवासी नागरिकांवर कारवाई करण्याबाबत उल्लेख करण्यात आला असला तरी प्रत्यक्षात वैधपणे जे अनिवासी नागरिक अमेरिकेत राहत आहेत त्यांच्यामागे चौकशीचे शुक्लकाष्ट लावण्याचे दार या आदेशाने उघडले आहे. अमेरिकेत राहत असलेल्या सुमारे ३ लाख अनिवासी भारतीयांकडे आवश्यक वैध दस्तावेज नसल्याचा अंदाज असून या सर्वांना ट्रम्प सरकारच्या सख्त आदेशांचा फटका बसण्याची शक्यता आहे.