सौदी अरेबिया: अरामको कंपनीच्या प्लान्टवर ड्रोन हल्ले

रियाध:
जगातल्या सर्वाधिक श्रीमंत तेल कंपन्यांपैकी एक अशी ओळख असलेली सौदी अरेबियातील अरामको कंपनीच्या दोन फॅसिलीटी केंद्रांना शनिवारी सकाळी आग लागली. या केंद्रांवर ड्रोन हल्ले झाल्याने ही आग लागल्याची माहिती सौदी अरेबियाच्या गृहमंत्र्यांनी दिली आहे.

मंत्रालयाने जारी केलेल्या निवेदनात असं म्हटलंय की, 'पहाटे चार वाजता औद्योगिक सुरक्षा बलाच्या सैनिकांनी गोळीबाराचे प्रत्युत्तर दिले. अबकेक आणि खुराइस येथील फॅसिलीटी सेंटर्सवर ड्रोन हल्ला झाला होता.'

आगीवर नियंत्रण मिळवण्यात यश आलं आहे. दरम्यान, मंत्रालयाने कळवलं आहे की देशातील पूर्वेकडील भागात झालेल्या ड्रोन हल्ल्यांची चौकशी सुरू आहे. हे कोणाचं कारस्थान आहे, त्याचा शोध घेतला जात आहे. मागील महिन्यातदेखील अरामकोच्या नॅचरल गॅसच्या फॅसिलिटी सेंटरवर हल्ला झाला होता. यात जीवितहानी झाली नव्हती. यमनच्या हूथी विद्रोही संघटनेने या हल्ल्याची जबाबदारी स्वीकारली होती.



गेल्या काही महिन्यात हूथीने सौदी अरेबियाच्या विमानतळावर क्षेपणास्त्र हल्ले केले होते. आजच्या ड्रोन हल्ल्यांची जबाबदारी अद्याप कोणा दहशतवादी संघटनेने स्वीकारलेली नाही. यावर्षी मे महिन्यापासूनच आखातात तणावाची परिस्थिती आहे. जून मध्ये अमेरिकेचे राष्ट्राध्यक्ष डोनाल्ड ट्रम्प यांनी ईराणवर हवाई हल्ले करण्याची घोषणा केली होती, पण ऐन वेळी त्यांनी ती मागे घेतली.