उत्तर कोरियात अणुचाचणीमुळे २०० कामगार ठार झाल्याची भीती

मटा ऑनलाइन वृत्त। टोकियो

उत्तर कोरियात घेण्यात आलेल्या भूमिगत अणुचाचणीदरम्यान झालेल्या स्फोटामुळे बोगदा कोसळून २०० कामगार ठार झाल्याची भीती व्यक्त करण्यात येत आहे. ही भूमिगत चाचणी घेण्यात आल्यानंतर सुरुवातीला एका बोगद्यात काम करत असलेले १०० कामगार ठार झाले. त्यानंतर दुसऱ्या एका बोगद्यात काम करणाऱ्या कामगारांना वाचवण्याचे काम सुरू असताना हाही बोगदा कोसळून अनेक कामगार यात गाडले गेले. यात आणखी १०० कामगार ठार झाल्याची भीती जपानमधील प्रसारमाध्यमांनी दिलेल्या वृत्तात व्यक्त करण्यात आली आहे. अणुचाचणी करताना ही दुर्घटना घडल्याचे टीव्ही असाही या वृत्त वाहिनीच्या वृत्तात म्हटले आहे.

अमेरिकेच्या भूगर्भशास्त्रीय सर्वेक्षणानुसार या चाचणीची क्षमता ६.३ रिश्टर स्केल इतक्या तीव्रतेच्या भूकंपाएवढी आहे. पहिल्या भूकंपानंतर काही मिनिटांत दुसऱ्या भूकंपाची क्षमता ४.१ एवढी असल्याचे सर्वेक्षणात स्पष्ट करण्यात आले आहे.

ही भूमिगत अणुचाचणी शक्तिशाली असल्याने अनेक डोंगर कोसळण्याचा इशारा तज्ञांनी दिला आहे. शिवाय चीनच्या सीमाभागातील वातावरणात किरणोत्सर्ग होण्याचा धोकाही व्यक्त करण्यात आला आहे.

उत्तर कोरियाने २००६ पासून केलेली ही सहावी भूमिगत अणुचाचणी आहे. या चाचणीमुळे अनेक ठिकाणी भूस्खलनाच्या घटना घडल्याचे उपग्रहाद्वारे घेण्यात आलेल्या छायाचित्रांवरून स्पष्ट होत आहे. ३८ नॉर्थ वेबसाइटने दिलेल्या वृत्तानुसार या चाचणीनंतर पुंग्ये-री भागात भूकंपसदृश्य स्थिती निर्माण होऊन जमीनीची पातळी काही अंशी वर उचलली गेली आहे.