पॅरीस: करोनच्या संसर्गामुळे संपूर्ण देश बेहाल झाला असताना दुसरीकडे फ्रान्सच्या राष्ट्रपतींनी राष्ट्रपती भवन एलिसी पॅलेसमधील सजावटीसाठी फुलांवर मोठ्या प्रमाणावर खर्च केला आहे. या खर्चामुळे फ्रान्सचे राष्ट्रपती इमॅन्युअल मॅक्रॉन यांच्यावर विरोधकांनी टीकास्त्र सोडले आहे. सोशल मीडियावरही मॅक्रॉन यांनी ही उधळपट्टी रोखायला हवी होती, असा मतप्रवाह समोर आला आहे.
मॅक्रॉन यांनी २०२० या वर्षात फक्त फुलांवर ७, २९, ००० डॉलरचा (जवळपास पाच कोटी ३६ लाख २७ हजार रुपये) खर्च केला आहे. फ्रान्समदील 'पोलिटिस' ने दिलेल्या वृत्तानुसार, मॅक्रॉन यांनी आपल्या या खर्चाबाबत आपल्या आधीच्या सर्व राष्ट्रपतींचाही विक्रम मोडीत काढला. याआधी फ्रान्सचे राष्ट्रपती असलेले फ्रांकोइस होलांदे यांनी २०१५ मध्ये एक लाख ६२ हजार डॉलर आणि निकोलस सरकोजी यांनी २०११ मध्ये एक लाख ७४ हजार रुपये खर्च केले होते.
वाचा: बापरे! व्हाइट हाउसमध्ये फर्स्ट लेडीच्या प्रसाधनगृहावर होणार 'इतक्या' कोटींचा खर्च
मंदीतही एवढी उधळपट्टी!
राष्ट्रपती भवनाच्या सजावटीसाठी एवढा खर्च झाल्यानंतर सोशल मीडियावर फ्रान्सच्या राष्ट्रपतींवर जोरदार टीका सुरू झाली. संपूर्ण देश करोनाच्या संकटाला तोंड देत आहे. देशात भयंकर आर्थिक मंदी आली आहे. या कठीण काळात राष्ट्रपतींनी एवढा खर्च करणे अयोग्य असल्याचे लोकांनी म्हटले आहे. करोनाच्या साथीमुळे फ्रान्समध्ये बेरोजगारीत वाढ झाली आहे. फ्रान्स सरकारने आपली अर्थव्यवस्था रुळावर आणण्यासाठी १२१ अब्ज डॉलरचे पॅकेज जाहीर केले आहे.
वाचा: तुर्कीच्या राष्ट्रपतींचा WhatsApp वर बहिष्कार; 'मेक इन तुर्की' अॅपला दिली पसंती
करोनामुळे एलिसी पॅलेसमध्ये प्रवेश नाही
करोना महासाथीमुळे राष्ट्रपती भवन एलिसी पॅलेस सामान्य नागरिकांसाठी बंद ठेवण्यात आले होते. या ठिकाणी बैठकाही व्हिडिओ कॉन्फरसिंगद्वारे घेण्यात आल्या होत्या. त्यामुळे मोजक्या लोकांसाठी पॅलेसच्या सजावटीवर एवढा खर्च करणे चुकीचे असल्याचे मत नागरिकांनी व्यक्त केले आहे.
वाचा: वाहने नसणार, रस्तेही नसणार; सौदी अरेबिया वसवणार आधुनिक नवीन शहर
याआधीही उधळपट्टीचे झाले आहेत आरोप
मॅक्रॉन यांच्या सरकारवर याआधीदेखील उधळपट्टी केल्याचा आरोप करण्यात आला आहे. एलिसी पॅलेसमधील क्रॉकरीवर जवळपास साडे चार कोटींचा खर्च करण्यात आल्याचा दावा एका वृत्तपत्राने केला होता. त्यानंतर सरकारने हे आरोप फेटाळून लावत क्रॉकरीची किंमत ६० हजार डॉलर इतका असल्याचे सांगितले होते.