वृत्तसंस्था, योकोहामा
जपानच्या जहाजावर करोना विषाणूचा संसर्ग झालेल्यांची संख्या रविवारी ३५५ वर पोहोचली असल्याची माहिती जपानच्या आरोग्य मंत्रालयाकडून रविवारी देण्यात आली. आतापर्यंत १ हजार २१९ जणांच्या चाचणीत ३५५ जण करोनाबाधित असल्याचे आढळले आहे, अशी माहिती डायमंड प्रिन्सेस क्रूझवर झालेल्या बैठकीत देण्यात आली.
'करोना'चा संसर्ग रोखण्यासाठी सुरू असलेले जपानचे प्रयत्न हा आता आंतरराष्ट्रीय चिंतेचा विषय झाला आहे. जपानच्या या जहाजावर एकूण ५० देशांतील प्रवासी आणि कर्मचारी मिळून ३ हजार ७०० पेक्षा जास्त लोक आहेत.
जहाजावरील पहिला रुग्ण हाँगकाँगमध्ये 'पॉझिटिव्ह' आढळल्यानंतर जपानी अधिकाऱ्यांना आता प्रवासी आणि कर्मचाऱ्यांमध्ये नवा संसर्गजन्य आजार सापडला. त्यांना स्थानिक रुग्णालयांमध्ये दाखलही केले गेले. इतरांना मात्र आपापल्या केबिनमध्येच राहण्याची विनंती करण्यात आली. त्यांना दिलेला १४ दिवसांचा कालावधी येत्या बुधवारी संपतो आहे.
अमेरिकेने रविवारी आपल्या काही नागरिकांना जहाजावरून बाहेर काढण्याची तयारी केली. मात्र, त्यांना आणखी दोन आठवड्यांसाठी त्यांच्या घरीच वेगळे ठेवले जाणार आहे.