भारतीय टॅक्सीचालकावर वांशिक हल्ला

वृत्तसंस्था, मेलबर्न

ऑस्ट्रेलियामध्ये पुन्हा एकदा भारतीय टॅक्सीचालकाला लक्ष्य करण्यात आले असून, एका महिलेसह दोन प्रवाशांनी केलेल्या मारहाणीमध्ये हा २५ वर्षीय भारतीय चालक गंभीर जखमी झाला आहे. या दोन्ही प्रवाशांनी वांशिक शिविगाळ केल्याचा आरोपही या चालकाने केला आहे. ऑस्ट्रेलियातील टास्मानिया राज्यात सँडी बे मॅक्डोनाल्ड्स येथे शनिवारी रात्री ही घटना घडली.

प्रदीप सिंग (२५) असे टॅक्सीचालक तरुणाचे नाव असून तो ‘हॉस्पिटॅलिटी’चे शिक्षण घेत आहे. तो शनिवारी रात्री या दोन प्रवाशांना घेऊन जात होता. त्यातील महिलेला उलट्या होऊ लागल्यामुळे त्याने तिला बाहेर जाऊन उलट्या करण्याचा सल्ला दिला. त्यावर दोन्ही प्रवाशांनी चिडून मारहाणीस सुरुवात केली. संबंधित महिलेचे वर्तन उद्धट होते आणि तिने भाडेही देणार नसल्याचे धमकावले. दोघांच्या मारहाणीत प्रदीपसिंग बेशुद्ध पडला. त्याला रॉयल होबार्ट हॉस्पिटलमध्ये दाखल करण्यात आले आहे. दरम्यान, ऑस्ट्रेलियात टॅक्सी चालवणे धोकादायक असल्यामुळे आपण यापुढे टॅक्सी चालवणार नसल्याचे प्रदीप सिंग याने म्हटले आहे. या दोन्ही प्रवाशांवर मारहाणीचा आरोप ठेवण्यात आले असून, त्यांना २६ जून रोजी कोर्टात हजर राहावे लागणार आहे, अशी माहिती पोलिस निरीक्षक इआन विश-विल्सन यांनी दिली. हल्लेखोरांनी वांशिक टिप्पणी केली असली, तरी वांशिक द्वेषातून हा हल्ला झाला असण्याची शक्यता नाकारली आहे.

ऑस्ट्रेलियातील वर्षभरातील तिसरा हल्ला

ऑस्ट्रेलियातील भारतीय टॅक्सीचालकावर झालेला हा वर्षभरातील तिसरा हल्ला आहे. याआधी २५ मार्च रोजी पहाटे अर्जीली सेंट मॅकडोनाल्ड्स येथे ली मॅक्स जॉय या भारतीय टॅक्सीचालकावर चार मुलांनी हल्ला केला होता. तर गेल्या वर्षी जूनमध्ये चार व्यक्तींनी अन्य एका टॅक्सीचालकाला मारहाण केली होती.