नवा नावाडी हवा

ब्रिटनचे पंतप्रधान डेव्हिड कॅमेरॉन हे युरोपीय समुदायात राहण्याच्या बाजूचे होते. पण, नागरिकांनी विरोधात मत टाकले. या पार्श्वभूमीवर ब्रिटनच्या नागरिकांशी संवाद साधताना कॅमेरॉन यांनी आपल्या राजीनाम्याचा निर्णयही जाहीर केला. त्यांच्या भाषणाचा हा अंश...

आपल्या देशाने नुकताच एक मोठा, कदाचित देशाच्या इतिहासातील सर्वात मोठा लोकशाहीवादी निर्णय घेतला. या निर्णयाचा आदर केलाच पाहिजे. या मोहिमेत माझ्या बाजूने सहभागी झालेल्या आणि पक्षीय मतभेद बाजूला सारून देशहितासाठी आवाज उठवणाऱ्या सर्वांचे मी आभार मानतो. तसेच या मोहिमेत ‘बाहेर’ पडण्याच्या बाजूने मते दिलेल्या नागरिकांचेही मी आभार मानतो.

ब्रिटन युरोपीय समुदायातून बाहेर पडणार असला, तरी ब्रिटनची अर्थव्यवस्था ही मूलतःच मजबूत आहे. त्यामुळे शेअर बाजार आणि गुंतवणूकदारांनी घाबरून जाण्याचे कारण नाही. त्याचबरोबर युरोपीय देशांमध्ये राहात असलेले ब्रिटनचे नागरिक आणि देशात राहात असलेल्या युरोपीय नागरिकांनीही घाबरण्याचे कारण नाही. या निर्णयामुळे तुमच्या परिस्थितीत तत्काळ कोणतेही बदल होणार नाहीत.

युरोपीय समुदायाशी नव्याने बोलणी करण्यासाठी आता आम्हाला तयारी करावी लागणार आहे. युनायटेड किंगडममधील सर्व घटकांचे रक्षण करण्यासाठी स्कॉटिश, वेल्स आणि नॉर्दन आयर्लंडच्या सरकारांनाही यात सहभागी करून घ्यावे लागेल. पण, या सर्वांबरोबर आता आम्हाला एका सशक्त, दृढनिश्चयी आणि कटिबद्ध अशा नेतृत्वाची गरज आहे. गेली सहा वर्षे मी या देशाचा पंतप्रधान आहे याचा मला अभिमान असून तो मी माझा सन्मान समजतो.

ही मोहीम लढवताना, युरोपीय समुदायात ब्रिटन मजबूत, सुरक्षित आणि उत्तम असल्याची भावना होती. हे सार्वमत माझ्यासह कोणत्याही राजकीय नेत्याच्या भवितव्यासाठी नव्हते, तर यामागे ब्रिटनच्या हिताचा विचार होता. मात्र, ब्रिटनच्या नागरिकांनी वेगळ्या वाटेवरून जाण्याचा निर्णय घेतला. त्यामुळे मला वाटते की, ब्रिटनला आता त्या दिशेला घेऊन जाणाऱ्या एका नव्या नेतृत्वाची गरज आहे. पंतप्रधान या नात्याने येत्या काही आठवड्यांत आणि महिन्यांमध्ये देशाचे हे जहाज सावरण्यासाठी मला जे जे काही करणे शक्य आहे ते मी नक्की करेनच. पण, या जहाजाचा सुकाणू पुढच्या पडावापर्यंत घेऊन जाण्यासाठी मी योग्य नाविक नाही, असे मला वाटते.

नव्या नेतृत्वासाठी वेळापत्रक तयार केले नसले, तरी कंझर्व्हेटिव्ह पक्षाच्या ऑक्टोबरमध्ये होणाऱ्या परिषदेत नवीन पंतप्रधान आपली जागा घेतील. तोपर्यंत पुढचे तीन महिने मी पंतप्रधानपदावर असेन. या देशावर माझे खूप प्रेम असून, याची सेवा करण्याची संधी मला मिळाली हा मी माझा सन्मान समजतो. या देशाच्या उज्ज्वल भवितव्यासाठी जे काही करणे शक्य असेल ते करण्यास मी तत्पर असेन.